ZALEN July 23, 2026 : Mizoram Pradesh Congress Committee (MPCC) chuan Foreign Contribution (Regulation) Amendment Bill 2026 chungchang chanchinthar lakhawmtute an kawm a, Chief Minister chu he bill pharh a nih loh nana hmala turin an duh thu an sawi.

Mizoram Congress hruaitute chuan FCRA Bill, 2026 bill hi a tlang a nih chuan Kristiante chu a tuar nasa ber tur niin an sawi a, hman a nih hma hauhin Mizoram pawhin a tuar tan tawh an ti a, CKTP enkawl Youth Recreation Centre (YRC), Falkland-a mi pawh a tira sak tum angin sak a nih loh phah a, Lengpui-a Catholic Father ho enkawl St. Xavier College pawh Foreign fund an dawn theih loh vangin tih tawp a nih phah niin an sawi. Foreign fund dawng tura lisence neih leh renew ringawt pawh a buaithlak tawh an ti.

MPCC chuan Chief Minister chu a rang thei ang bera hma la turin an ngen a, ram len hnam leh sakhaw thilah chuan tanrual tlat a ngai a ni an ti a. FCRA dodalna kawngah pawh Chief Minister ho hian Kohhran hrang hrang, NGO leh Political party te hma lak ho a ngai tak zet an ti.

MPCC hian vawiin khan an vice president John Siamkunga, Ex MLA hovin Chief Minister hnenah FCRA Bill, 2026 chungchangah a rang thei ang bera hma la tura ngenna an thehlut bawk.

MPCC chuan an thu thehluh-ah hian FCRA Amendment Bill, 2026 chu Kristian te leh NGO te tan a that loh avangin hnuk let tura nawr turin Chief Minister kaihhruaina hnuaiah Kohhran hruaitute, NGO hruaitute leh Political party tin hruaitu ten Prime Minister hmuh ni rawh se, tiin an thlen.

FCRA Bill, 2026 hi Parliament-a putluh a nih hunah Mizoram MP ten a thatlohna leh dodalna thu sawi ngei se, vote thlak hunah pawh 'hai' mi lo in, a dodal zawng ngeiin vote thlak ni se an ti a.

FCRA Bill, 2026 dodalna resolution chu Mizoram Legislative Assembly-ah pass a nih ngei theh nan Mizoram sawrkar chu Special Assembly Session ko turin an ti bawk.