ZALEN August 31, 2026 : ZPM party chuan vawiinah khan chhung inkhawm an hmang a, thusawitu K. Laltluangkima, Rajya Sabha MP chuan FCRA chungchang chu Indira Gandhi hun lai atang tawha ruahmanna awm tawh a nih thu sawiin, Congress te pawh an bang bik lo tih a sawi.

Rajya Sabha MP K. Laltluangkima chuan, "MP lak luh hlimah ram hruaitu mi pawimawh tak tak paruk lai ka hmu hman a. Chung zingah chuan Union Home Minister pawh telin, Amit Shah chu kan CM leh kohhran hotute zuk hmuh hnua hmu ka nih avangin FCRA chungchang JPC kuta dah a nih chhan hi kan CM leh kohhran hruaituten an hmuh vang a nih leh nih loh ka zawt kher a. Amit Shah chuan a nih thuin min chhang. JPC ah hian Lok Sabha leh Rajya Sabha MP 10 ve ve te thlangin an ngaihtuah dawn a ni. Tin, FCRA chungchang hi Indira Gandhi hun lai atang tawha ruahmanna lo awm tawh a ni a, kan Congress unaute hi an bang bik lo a ni," a ti.

K. Laltluangkima chuan ZPM sawrkar kal tawh chinah 'Kan ti ang' an tih te, manifesto-ah pawh an dah lem loh an tih that tak tak te a awm tih sawiin, "Sawrkar administration-ah te lang tlang tak leh hna lak pawh dik taka lak a nih danah te hian kan sawrkar mek hi a ti tha thawkhat hle. Kut hnathawktute khai chhuahna lam department hrang hrangte pawhin theihtawp kan chhuah a, a tawi zawngin sawrkar department zawng zawnga kan hmalakna te hi a lungawithlak thawkhat hlein ka hria," tiin a sawi.

"Kawngpui tha leh tlo chungchang bikah hian theihtawp chhuah kan ngai nasa hle a, central sawrkarah pawh a theih anga nasaa min pui turin MP ka nihna atang pawhin hma lak ka tum a ni. Mipui tana tha tur leh kalphung thar zawka kalpui pawh kan ngah hle. Buhfai buk dik te, aikal lak tihtawp te, pension hlawh dik loa lak tihtawp te, Aizawl khawpui chhehvela ram buai chin fel te, sawrkar kal tawh te anga party worker te work order hum sa cancel sak te kan ti ve lo te, sawi vek sen loh khawpa tam sawrkar kal ta te tih ve loh a awm," tiin kum 2028 a an sawrkar nawn theih ngeina tur thil tam tak an tih thu a sawi a ni.