ZALEN, July 24, 2026: Mizoram Baptist Kohhran (Baptist Church of Mizoram) chuan Pathianni hian Foreign Contribution Regulation Act (FCRA) pualin BCM pum huap tawngtai an nei dawn.

Ningaini khan General Secretary Rev. R.Lalrintluanga chuan tawngtai chungchanga hriattirna tichhuakin Nilainia Administrative Committee Emergency Online Meeting-in ‘FCRA Pual, BCM Pum Huap Tawngtai’ neih a rawt tih a tar lang.

Tawngtai hi Pathianni tuk (chawhma) inkhawm hun remchangah nei turin kohhranhote a ngen a, tawngtai thupui tur panga a tar lang bawk.

BCM general secretary hriattirnaah hian India-ah hian kohhran pawl tam tak zirna (institution), damdawi in, hnuchham enkawlna, mihring nun chhawmdawlna leh chawikanna leh a dang tam takten ram pawn atangin tanpuina sum tam tak an dawng thin tih tar langin, “Pawl thenkhat, ram pawn tanpuinaa innghat, tanpuina an dawn loh avanga kal hleithei lote pawh an awma hriat a ni,” a ti.

Ram pawn atanga tanpuina lut thin thunun tur hian India sorkarin chuan FCRA a siam tih a tar lang a. He dan hi tun hnaiah sorkarin tihdanglam tumin parliament fur thutkhawm kal mekah put luh a tum tih a tar lang a. “Tihdanglam a tum dan chuan Kristiante rawngbawlna nasa taka a nghawng theih dawn avangin India rama kohhran hrang hrang leh Kristian pawl tam takte chuan dodalna an kalpui mek a ni,” a ti.

Hetianga India-a an Kristianpui tam takten harsatna an tawh theih avang hian kohhran tinte tawngtaina buatsaih turin general secretary chuan a ngen a. Tawngtai thupui panga - India sorkarin FCRA tihdanglam a tum a kaltlangpui loh nan; he dan avanga harsatna tawk thin zawng zawngten harsatna an tawh chhunzawm loh nan; India-a an Kristianpui tihduhdahna leh nekchepna tawk thinte tan; India-ah sakhaw zalenna a awma mipuite an inpumkhat theih nan leh India-ah Pathian ram a lo zau deuh deuh theih nan tihte a tar lang.

FCRA tihdanglam tumna hi eptu party hrang hrangte pawhin an duh loh leh parliament-a pass a nih loh theih nan hma an la mek hlawm.

Thlalak - AI hmanga siam