Ruihhlo do Tun hnaiah Home Minister hovin Police, Excise leh Mizorama tlawmngai pawl lian ber YMA hruaitute chuan meeting neiin ruihhlo do kawnga inpuihtawn dan tur an sawiho a. Aizawl leh Mizoram khawpui dangahte thlamuang taka mi tin an chenho theihna turin Police, Excise leh YMA-te inkarah thawhhona tha tak neih a, dan loa ruihhlo zuar leh ruite thenfai 'Hnatlang rûnpui' neih an rêl a. Hetianga sawrkar leh tlawmngai pawl ten hmathar an la leh tur hi a lawmawm a, hmasawnna thar a thlen ngei a beiseiawm. Ruihhlo hian nunna a heh mai bakah sualna chi hrang hrang thilruk, thatchhiat leh thil thalo tam tak a keng tel a. Chumai bakah natna hlauhawm tak tak HIV, Hepatitis te hi nasa takin ruihhlo ngai leh ti thinte hian an thehdarh thin bawk. Kumin 2016 chhung ringawt pawhin Mizoram ah ruihhlo vangin mi 39 an thi tawh bawk a, tun ang zel anih chuan kumtawp ah mi engzat tak ruihhlo vang hian boral ang aw? Ngaihtuah ringawt pawhin a rapthlak a, tih tak zeta do hi a ngai reng a ni. Mizoram hi khawvela ruihhlo siamna hmun hmingthang 'Golden Triangle' hnaiha awm leh ruihhlo tawlhna kawng ber a ni a. Chumai bakah ramdang Bangladesh leh Myanmar ramri a awm anih bawk avangin ruihhlo tawlhtute tan tlanchhiat a awlsam bawk nen min chimbuai hneh hle a. Kan thenawm rama sawrkar mumallo leh chak tawklo in dan leh thupek kenkawhna a nghawng rah kal zelah ruihhlo in min chimbuai lehzual ti pawhin a sawi theih awm e. Engpawhnise ruihhlo a awm chhan chu a mamawhtu an awm vang a ni tih hi thil chiangsa a ni a. Ruihhlo mamawh (demand) hi awmlo se tuman an zuar (supply) duh lo ang tih pawh thil chiangsa a ni bawk. Sawrkar lam leh tlawmngai pawlte hian tuna kalphung ah chuan a bula ti lovin a ler atangin kan thuai em aw? Demand lam tih tlem aiin supply tih tlem tum hian kan thawk zawk niin a lang. Demand tih tlem leh supply tihtlem hi a rual a kal loh chuan hmalaknain awmzia a nei thui thei lovang. Police, Excise leh tlawmngai pawlten ruihhlo zuar an manin tun ai hian Court lama bawhzui kawngah nasa lehzualin tan la thei se. Court hmaa thuhretu a tan te, an chungchang chhuizui ve zel kawngah te teirei peihna a awm thinloh avangin ruihhlo zuar te hrem lohin an chhuak fo thin a, ruihhlo zuar te hrem an nih ngei theihnan a tira phur hlut duhtawk mai lova a tawp thlenga tanlak lehzual a pawimawh khawp mai. Supply tih tlem lamah force leh tlawmngai pawlte an thawh lai hian kohhran lam hian demand titlem tur hian tun aia nasa zawk hian hna thawk thei se thil lawmawm tak a ni ang. Tun dinhmuna Mizoram mipuiin ruihhlo kan do danah hi chuan kohhrante hian tha an thawh tawklo deuh niin a lang a, ruihhlo do kawnga thawktute tan tawngtai mai bakah ruihhlo laka naupang leh thalaite humhim turin tun aia nasa zawk hian tanla thei se Mizoram hian a sawtpui ngei ang. Mizoram ah ngat hi chuan kohhran aia mipui hneh thei hi an awm lo a, sum leh pai mai bakah tih tak zetin kawng dika thalaite hruai turin tan han la thar leh se a va duhawm em. Sawrkar lam pawhin tun ai hian tlawmngai pawl hrang hrangte hi ruihhlo do turin hmang tangkai lehzual se. YMA, VDP, JAC leh a dangte hi an hnathawh hriatpuiin an mamawh ang sum leh paite pawh a theih chin chinah puih dan zawng thei se, chu chuan phurna a pe ang. Chumai bakah hnathawk thate chu engemaw chawimawina 'Citation' ang chi te siamsak ni ta se tun ai hian ruihhlo do kawngah hian hma kan sawn ngei a beiseiawm e. -------- Quote Tun dinhmuna Mizoram mipuiin ruihhlo kan do danah hi chuan kohhrante hian tha an thawh tawklo deuh niin a lang a, ruihhlo do kawnga thawktute tan tawngtai mai bakah ruihhlo laka naupang leh thalaite humhim turin tun aia nasa zawk hian tanla thei se Mizoram hian a sawtpui ngei ang.