Zirtawpni khan Zuangtui Industrial Estate-ah Zuangtui Bamboo Processing Factory chu hawn a ni a, a hawngtu Dr. R. Lalthangliana chuan, a nihna tur anga taka hman a nih chuan a hlu viau tura a ngaih thu a sawi. 

Bamboo Development Agency-in National Bamboo Mission hnuaia an din he mau sawngbawlna khawl hi Agarbati stick chi hrang hrang siamchhuahna tur a ni a, thlakhat chhungin agarbatti stick hi Kg. 10400 siamchhuak thei tur a ni a, heng stick te hi India rama agarbatti siamtu lian ber Ranga Rao & Son, Mysore te hnena hralh tura inbiakna kalpui mek a ni a, anni lam hian a hmunah pawh an rawn kalchilh tawh a, an thil siamchhuah te pawh endik vek tawhin lei sak vek pawh an inhuamthu an sawi. Anni hian India ram bakah, Laos, Vietnam leh USA ah te pawh hetiang agarbati stick siamna factory hi an bun a, heng hmun atang hian stick siamsa hi an lalut ta thin ni.

Tuna Agarbati stick siamna khawl te hi khawl ropui tak a ni hran lo a, a hmuna tel ve pakhat pawhin, "Mizo pa themthiam tak tak te pawhin an siam thiam ve mai tur hmel a pu. Kuhva thelna khawl ngaihtuah chhuak thei tan siam ve harsa tur awmin ka hre lo," a ti a, man tlawm zawkin an siam theih mai a ring bawk. Mi tam tak tan eizawnna a nih a rin thu pawh sawiin, "Khawtin maiah hetiang ang khawl hi awm se, chung ho siamchhuah chu sawrkar hian leikhawm ve leh chhawng se la, sorkar tan pawh income a ni ang a, mi tam tak tana eizawnna tha tak tur a ni ang," tiin a sawi.

Dr. R. Lalthangliana chuan an company dawr te hian ram chhunga duhkhawp an hmuh loh avangin ram danga factory din hial an nih avangin an duhkhawp supply an pe thei lovang tih a hlauhawm zawk thu a sawi. He hmuna awm ve pakhat chuan minister sawi anga demand a san a, tih tak zeta kalpui a nih chuan mi tam tak tak eizawnna tling tur a nih theih thu sawi ve bawkin, an mau hman ang ngaihtuah phei chuan Mau hman tangkaina tha ber te zingami a nih ngei a rin thu a sawi a, a hma mi sawi ang bawkin khaw tam tak tan dinhmun siamna a nih theih a rin thu leh mi tam tak khaichhuahna hmanraw tha tak ni thei anih thu ZALEN a hrilh.

Heng agarbatti stick siamna bang mau nawi te hi Bamboo Charcoal leh Bamboo Vineger siamna atana a la hman theih a ni a, chumi tur chuan inbuatsaihna pawh an nei. Bamboo vineger (Mau hawl tui) hi pum lam tha lo tan pawh a tha hle niin Mizoramah pawh lo thlawr ve thin pakhat chuan ZALEN a hrilh a, pum lam tha lo tak pawh a that thu leh sa chiah hnip nan pawh a that hle thu a sawi. Khawchhak ram ho chuan Bamboo Charcoal (Mau meihawl) hi an hmang nasa hle niin sawi a ni a, Meihawl dang angin khu a siam tam lo niin an ti. Bamboo vinger siam thin chuan Mau hawl hi eng ang takin nge an siam a hriat loh thu a sawi thung.