Greenpeace India in a report danin kum tin mi maktaduai 1.2 vel bawr chu boruak chhe kaihhnawih natna avangin an thi ziah a, hei hi India ram khawpui hrang hrang 168 a boruak enfiahna behchhana siam a nih thu an report tel bawk. Delhi leh Patna chu khawvel huap pawha boruak chhiat berna khawpuite zinga mi an ni bawk. India sorkar chuan boruak chhe zel tih ziaawm tumin tun hnaiah pawh lirtheite chu boruak tihchhiat dan tiziaawm turin Bharat Stage IV an rawn duang thar a, 2020 ah phei chuan BS VI hial kai a tum bawk. Hetih lai hian khawpui hrang hrangte chu thil siam chhuahna hmun te, bawlh hlawh paihkhawmna hmun tein a hual vel khep khup a ni. India hmar lamah phei chuan loneitute chuan an thlai seng tawhna hnuhmaah te chuan thlasik apiangin a hnua thlai dang an chin leh nan Mizorama lo hal ang bawkin an hal thin a. Hei hian thlasik boruak vawt tak maiah chuan chhum ang mai, ‘smog’ an tih chu a zam chhahtir luk mai thin a. Delhi leh a chhehvel khawpuiin hei hi an tuar nasa hle a ni. Mizoram Pollution Control Board (MPCB) in kar tina boruak thiang hlim leh thianghlim loh an tehnaah Aizawl boruak chu India ram hmun tam tak aiin a la thianghlim hle a. Air Quality Index (AQI) chu tehkhawnga hmangin Mizoram chhung boruak chu kar khatah vawi hnih an teh ziah a ni. Hetah hian AQI-a 0 atanga 400 chung lam thlengin boruak that leh that lohna chu point pek a ni thin a ni, kum 2016-a a san berna lai Sikulpuikawnah AQI-ah 87 a tling a ni. Aizawl khawpui chhungah chuan Sikulpuikawn, Laipuitlang, Bawngkawn leh Dawrpui ah te teh thin a ni a. Heng bakah hian Lengpui, Champhai Kahrawt, Champhai Vengthlang, Kolasib Project Veng, Kolasib Diakkawn, Lunglei Farm Veng leh Lunglei Venglaiah te enfiah thin a ni. AQI san berna Sikulpuikawna point 87 chu a hniam lam a ni a. Hemi hmuna awm te chuan an zingah mihring chak lo tak a awm a nih chuan thawk lama harsatna tlem azawng a nei dawn tiin a hlauhawm dan tehna chuan a tarlang a. Air Quality Index-ah hian 100 chin chunglamah chuan lung tha lo, chuap thalo leh naupang tan thawk a hrehawm dawn a, 200 chung lamah chuan eng ang mi tan pawh awm rei chuan thawk hrehawm a siam dawn a, 300 chinah chuan hrehawm chauh ni lovin damlohna hial a thlen dawn a, 400 chung lamah phei chuan hrisel tha takteah pawh harsatna a thlen thei dawn niin AQI tehna chuan a tarlang a ni. Tehnaah hian 2016 khan Laipuitlangah 35, Bawngkawnah 65, Dawrpuiah 79, Lengpuiah 37 te a ni a, khaw dangte pawh hi 40 hnuai lam vek an ni. AQI ah hian la hniam viauin lang mahse boruak chhiat dan hian kum tinin san lam a pan a. Sikulpuikawnah hian 2014 ah 45, 2015 ah 67 niin 2016 ah chuan 87 a lo ni tawh a ni. Aizawl boruak hi a that viau lai hian chhiat lam erawh a pan mek tho a ni.