Mizoram khawpui ber Aizawl hi February 25, 1890 atanga vawiin thlengin mei mit lovin a la awm a, khawpuia roreltu, Aizawl Municipal Corporation Board of Councillors Meeting March 10 & 11, 2022-a neih chuan Aizawl Day atan Aizawl khawpui mei mit lova a din champhaphak, February 25 chu a pawm a. He ni hi AMC-in kum tin ni pawimawh atana hmangin ropui taka hman a nih theih nan ruahmanna a siam thin a ni.

Aizawl Day hi a tum khata atan AMC huaihawtin nikum khan hman a lo ni tawh a, kuminah pawh hian AMC bultumin February 21-24, 2024 inkar hian Lammualah hman a ni leh dawn.

Aizawl dincham, Feb. 25 hi Pathianni a nih avangin lawm a remchang lo va, hei vang hian a lawmna hun hi Inrinniah khar a ni dawn a ni.

Kumin Aizawl Day hmanna turah hian AMC chuan ruahmanna hrang hrang an siam a. A bultanna, February 21 (Nilaini) zing dar 6.30-ah walkathon (kea kalhona) neih a ni dawn a. Ward tin atangin mi 30 kal chhuak tura beisei an ni a. A tel zawng zawngte hi T-Shirt pek tum an ni.

Deputy Mayor R. Thanglura chuan A.R. Lammualah zing dar 7:00-ah Aizawl Day hawnna a nei dawn a ni.

Aizawl Day hman chhung February 21 atanga 24 inkarah Sipai Lammual-ah programme hrang hrang neih tum a ni a, lammual-ah hian cosplay, carnival leh bouncing castle-te pawh a awm tel dawn a. Aizawl Day ni tak, February 25 hi Pathianni a nih avangin February 24-ah mayor hoin Sipai Lammual-ah a lawmna programme neih tur a ni a. Mizo zaithiamte zaina concert-in a zui dawn a ni.

Hei bakah hian ward tinte volleyball intihsiak, te, February 24 zingah faina hnatlangpui te buatsaih tum a nih bakah Aizawl-a cheng kum upa ber hnenah chawimawina hlan tum a ni bawk.

Aizawl Day hman chungchangah hian a lawm hmasatu, Aizawl Mihlun Thlahte Secretary Mathara chuan Aizawl day hi kum 2020 atang khan Aizawl Mihlun Thlahte chuan an lo hmang tan tawh niin a sawi a. “Aizawl hi a mi cheng zawng zawngte ta a nih angin huap zau zawka Aizawl miten kan hman hi tha a hriain Aizawl Municipal Corporation ah Aizawl Day chu an kutken turin kan va rawn a. AMC hian 2023 atang khan Aizawl Day a hmang tan ta a, lawmawm kan ti khawp mai,” tiin ZALEN a hrilh.

Hetih lai hian mi thenkhat chuan Aizawl Day lawmna atana AMC-in sum tam tak a seng thin chu tul lo an tih thu an sawi ve bawk a. Hetiang huau huau lam hawia sum sen vak ai chuan hmasawnna hnathawh nan hmang zawk se an duh tih an sawi.