ZALEN April 19, 2026 : Naktip Thawhlehni zing dar 7 atanga tlai dar 5 inkar chhung hian Aizawl Municipal Corporation (AMC)-a roreltu tur corporator thlanna neih tur a ni a, ruahmanna engkim peih fel a ni tawh.

Tuna AMC term hi March 1, 2026 khan a tawp a. Constitution of India, Article 243ZA-in thu neihna a pek leh Section 346 (1) of the Mizoram Municipalities Act, 2007-in mawhphurhna a pek angin State Election Commission (SEC), Mizoram chuan General Election to Aizawl Municipal Corporation, 2026 chu April 21, 2026 hian a buatsaih dawn a. Vote thlak that ngai a awm chuan April 23, 2026 zing dar 7 atanga tlai dar 5 chhungin thlak a ni ang a, April 27, 2026 zing dar 8 atangin vote chhiar a ni ang a. SEC ruahman dan chuan inthlan kaihhnawih zawng zawng hi April 30, 2026-ah chuan zawh fel vek tur a ni.

AMC electoral roll ennawnna chu August 5, 2025 atang khan neih niin AMC inthlanna a hman tur final Electoral Rolls chu January 7, 2026 khan tlangzarh a ni.

AMC huam chhungah hian ward 19 awmin voter awm zawng zawng hi 2,37,846 an ni a, heng zinga 1,09,376 chu mipa niin hmeichhia voter 1,28,470 an awm bawk.

Deputy Commissioner, Aizawl District chu District Municipal Election Officer atan ruat a ni a, inthlanna buaipuitu atan veng hrang hranga sawrkar hnathawkte chu ruat an ni bawk. 

AMC inthlanna atan hian Bharat Electronics Limited siam Electronic Voting Machine (BEL M2 EVM) hman a ni dawn a, BEL hian EVM-te hi an check vek bakah vote chhiar zawh a nih hma chuan an vil reng dawn a ni.

Inthlan lo awm turah hian polling station 257 ruahman a ni a, a tul dan zelin auxiliary polling station siam belh a ni ang a. SEC chuan C.C. Lalchhuangkima, MCS, Additional Secretary to the Government of Mizoram chu State Level Nodal Officer, Model Code of Conduct atan a ruat a. Election Expenditure atan Malsawmdawngliani, MF&AS, Director, Local Fund Audit & Pension chu a ruat bawk.

Candidate pakhatin ward pakhat ah Rs. 1,00,000 thleng an hmang thei a ni.

SEC chuan AMC inthlan neih turah hian kum upa te, damlo natna khirh bik nei polling station pan thei lo te leh pianphunga rualbanlo polling station pan thei lote tan anmahni ina vote an thlak theihna tur, home voting a ruahman a. Home voting hi ni April 13-16, 2026 thleng khan kalpui niin dilna lut hi 2,768 a awm.

Hriat theih chinah home voting hmanga vote thlak upa ber chu Nokungi (kum 108), College veng a ni.

Home voting dilna lut 2,768 zinga mi 2,594-in vote an thlak a. Vote thlak zat hi 93.71% niin thlak lo mi 174 an awm a, vote thak lote hi thi tawh te, damdawi ina awmte bakah vote thlak leh duh lo te an ni.

AMC inthlan 2026 neih turah hian Ward No. VIII chu voter tlemna ber a niin vote nei mipa 3,670 leh hmeichhia 4,305 an awm a, voter zawng zawng hi 7,975 an ni a. Ward No. VIII hian veng pathum - Armed Veng, Armed Veng South leh Chite veng te a huam a ni.

Ward No. XVIII chu voter tamna ber niin mipa 8,697 leh hmeichhia 10,209 an awm a, voter hi 18,906 an ni a. Veng pariat - Tuikhuahtlang, Mission Veng, Model Veng, Salem Veng, Dam Veng, Venghnuai, Thakthing leh ITI veng te a huam a ni.