Ruihhlo a hluar, thalai zingah ruihhlo ti an tam’ tih chu tlawmngai pawl hruaitu leh mi thahnemngaite kam chhuak a ni a. A dikzia lantirtu chu Aizawl khawpuia damdawi rui inpel sup sup mai te, Home tawt em em reng mai te hian a tichiang hle awm e. Police, Excise leh tlawmngai pawl ten nasa takin a do hna thawk thin bawk mahse ruihhlo hian kian lam ai chuan pun lam a pan zel emaw tih mai a awl rum rum e.   Excise & Narcotics Department chhinchhiah danin kumin January thla atang khan Mizoramah damdawi hman sual vanga thi mi 40 an awm tawh a, heng zinga 9 hi hmeichhia an niin a dang 31 hi mipa an ni. Damdawi hmansual vanga thi te hian heroin chu an thihpui tam ber a, a remchang an hmuh ang ang tihpawlh pawh eng emaw zat an awm bawk.   Excise & Narcotics department thawktute chuan ruihhlo chu khawchhak lam atanga lolut an ni tlangpui niin Zalen an hrilh a. Tun hnaiah erawh Silchar lam atanga lokalte pawh a awm nia sawiin hei hi Manipur lam atanga lolut nia an rin thu an sawi. Ruihhlo phurhnan hian private motor leh two wheeler te chu hman nasat a nih thu an sawi a. Zawhna chhangin Excise thawktute chuan drug addict zingah tithar an tam lutuk loa an hriat thu sawiin a ti thinho hi an vah tam avangin tam angin an lang nia an hriat thu an sawi bawk.   Central YMA in ruihhlo do tura a din SRS (Supply Reduction Service) 7th batch te chuan mawhphurhna an lak tirh July ni 7,2018 atang khan No.4 hawng 40, can 665 leh chhinsen 69 an man tawh a. Sualna thila inhnamhnawih mihring 475 man tawhin home ah mi 69 dahin Excise ah 3 leh Police ah mi 4 an pe a, counselling turin mi 133 an ti tawh bawk. SRS hotute chuan damdawi chu Mizoramah a hluar reng tih sawiin a rate pawh a to thei lo niin an sawi a. Tunlai hian heroin pawh a man tlahniamin hawng khat Rs. 35,000, can khat Rs. 2500 leh chhinsen khat Rs. 1000 te a ni tih Zalen palai an hrilh.   SRS hotute chuan drug ti zingah hausa an awmloh avangin damdawi an tihna turin mipa zingah rukruk a hluar phah hle niin an sawi a, hmeichhe zingah pawh mahni inzuara an ruihna tur tuak eng emaw zat an awm niin an sawi bawk.   Ruihhlo ti thinte avang hian Mizoramah HIV a hluar phah hle tih MSACS thawktute chuan an sawi a, hengte hi hriau thianghlim lo inhman tawm avanga kai, a ruka inchiu leh invenna (condom) tel lova mipat hmeichhiatna hmang thinte vang nia hriat an ni.   Ruihhlo hian chhungkua, khawtlang leh ram a tibuai a, thalai nunna hlu tak a suat nasa em em mai bawk si nen. A do leh tihrem kawngah sawrkar, kohhran leh khawtlang nasa lehzuala tan tlan a ngai ta e.