2nd Assam Rifles-in hnam inpumkhatna (National Integration) puala Mizoram Journalists’ Association member mi pariat leh zirtirtu mi pahnih te chuan September 18 atanga 26 inkar chhung khan India hmarchhak state hrang hrang an fang.

AR National Integration Tour-a kalte hian September 18, 2023 khan Guwahati an pan a, a tukah Arunachal Pradesh panin hmun pawimawh hrang hrang - kum 1962-a India leh China indona hmun hlui te, China sipai tam tak phumna hmun te, India leh China ramri Bumla pass, metre 100-a sang Jang tuikhawhthla te an tlawh a. Tawang khawpui daia India sipai hmunpui pakhat an tlawhnaah commander Brig. Devrat Shekhawat leh officer dangte nen an inkâwm a, thingpui an inho bawk.

Assam Rifles tour-a kalte hi Dirang, Tawang leh Bomdila-ah te riakin hmun pawimawh hrang hrang an tlawh a. An haw kawngah Bhutan ram an tlawh bawk a ni.

Assam Rifles-in hnam inpumkhatna atana chanchinbumi a zintirte hian Shillong-a Assam Rifles hmunpui ber, Laitkor tlawhin an museum an tlawh a, tun hma atanga Assam Rifles-te indona hmuna an lo chet tlatna hrang hrang te, mipuite tana an lo thawh tawhna leh thil hlu an dahkhawm hrang hrangte entir an ni a. Tour a kal te hian bengvarthlak an ti hle.

AR National Integration Tour-a kalte hian Assam Rifles hotu lu ber, Director General hmuh an tum a, Addl. DG nen an zin lai a nih avangin Brig. Rohit Sehgal leh officer dangte nen an inkâwm a ni.

Assam Rifles-in hnam inpumkhatna ‘national integration’ puala  hmarchhak state hrang hrang fangte hian Shillong-a Indian Institute of Management an tlawh bawk a. IIM hotute sawi danin tun dinhmunah zirlai 700 an nei mek a, zirlaite hian room hrang vek an nei bawk.

Zirlai pakhat hian kum hnih chhung zirna senso atan nuai 22 an sen a ngai tih an sawi a, an zirna senso atan hian bank chuan loan pek an awlsam hle nia sawiin dahkham pawh an phut lem lo niin an sawi a. An zirlaite chu India ram state hrang hranga mite an ni tih sawiin tun dinhmunah Mizo zirlai pakhat a awm mek.

IIM Shillong hian ram acre 120-a zau awhin mahni inenkawl tura duan a ni a. Tun dinhmunah India ramah IIM 21 a awm mek niin an sawi bawk.

MJA chuan an ngenna ngai pawimawha Assam Rifles hotuten hmarchhak state hmun hrang hrang fanna an buatsaihsak chu lawmawm an tih thu an sawi a; hun lokal leh zel turah pawh hetiang tour hi buatsaih leh theih nise an duh tih an sawi bawk.