India ram hi khawvel ram hrang hrang zingah hmeichhiate dinhmun chawikan tulna ram zinga mi a ni a. Chuvangin, sawrkar laipui chuan hmeichhiate dinhmun chawikang turin nasa takin hma a la a, chung zinga pakhat India sawrkar flagship programme, Ministry of Women & Child Development-in a kalpui mek chu ‘Beti Bachao, Beti Padhao’ tih a ni a. BBBP hi Hindi a ni a, saptawng chuan  ‘Save the girl child, educate the girl child’ tih a niin Mizo tawng chuan ‘Hmeichhe naupang chhanhim la, lehkha zirtir rawh’ tihna a ni.

India ramah fanute hian fapate aia duh loh zawk nih an lo hlawh tawh thin avang te, India ram mipui pun chhoh zel danah hmeichhiate punna chu rampum huapa mipate punna aia a hniam thin avangin Beti Bachao, Beti Padhao hi kalpui a ni. 

Beti Bachao, Beti Padhao hi kum 2015 khan India ramah kalpui tan niin a bik takin hmeichhe pian tlemna, child sex ratio hniamna hmunah kalpui tan a ni a. India ram dangte rualin Mizoramah pawh Saiha district-ah kalpui ve nghal a ni a, kum 2017 atang khan Serchhip district-ah kalpui leh a niin kumin atangin India ram district zawng zawngah kalpui tur tih a nih angin Mizoram district zawng zawngah kalpui vek a ni.

Beti Bachao, Beti Padhao lama hma latu, Women & Child Development department thawktute chuan he scheme-in a tum ber chu hmeichhe naupang chawikan a nih angin Mizoramah pawh theihtawpin hmeichhe naupangte tan hma an la thin tih an sawi a. Hmeichhe naupangte tan sport inelna te, awareness programme te an buatsaih thin tih an sawi a. Serchhip district-a hmeichhe naupangte tana hockey tournament an huaihawt chu sawrkar laipuiin best practice-ah a puang niin an sawi.

Women & Child Development department thawktute chuan hmun thenkhatah hmeichhe duh lohna a awm thin nia sawiin Mizoramah erawh duh lohna leh enhranna a awm lo niin an sawi a. National Girl Child Day, January 24-a sawrkar damdawi ina hmeichhe naupang piangte chu thilpekte pein certificate-te an hlan thin niin an sawi bawk.