Tuikuk mi sual ten November 13, 2009-a Bungthuam tlangval, Zarzokima (17) s/o Lalngilneia an kahhlum vangin Bru chhungkaw eng emaw zat chu Tripura lamah an tlanchhia a, heng mite hi tum eng emaw zat Mizoramah hruai let tum niin mi eng emaw zat chu an let leh a. Mahse, a tam ber chu let duh lovin Tripura-ah hian an inbengbel zui ta a. Heng mite hi Tripura lamah awm zui zelin Tripura electoral roll-ah thun chhoh zel an ni ta a ni.

Tuikukte hi kum 1997 vel atang khan Tripura-ah hian an pem thla tan a. An awm zel dan turah hian sawrkar laipui, Tripura leh Mizoram sawrkar bakah Bru aiawhte chu tum eng emaw zat inbiain ruahmanna an siam thin a. Mahse, heng ruahmannate hi a hlawhtlin thin loh avangin leh Bru tam berin Mizoram let an duh tlat thin loh avangin Mizorama let duh lote chu Tripura electoral roll-ah thun a, Tripura khua leh tuiah chhiar ni mai se tiin ruahmanna a awm ta a ni.

Election Commission of India ruahman angin Tuikukte hi a tahtawlin Tripura electoral roll-ah hian thu chhoh zel an ni a. Tripura-a inbengbel tawh, Mizorama vote la nei Bru hming zawng zawng chu kumin assembly inthlanpui awm hma ngeia an hming paih kim vek tura kalpui mek a ni.

Election department hotute sawi danin Election Commission duh dan ang hian Tripura-a inbengbel tawh, Mizoram electoral roll-a hming la chuangte hi February thla chawhma lam thleng khan Mizoram electoral roll atangin mi 4,339-te paih a ni tawh a. La paih loh hi mi 7,319 an awm nia hriat a ni. Tripura assembly inthlanpui avang khan Tripura state election commission chuan Bru vote nei an state electoral roll-a an suan luh tawhte hming ERONet kaltlanga Mizoram election department hnena a rawn thawn thin chu a titawp lailawk rih a. An rawn chhunzawm leh thuai beisei a ni.

Kum 2018-a Mizoram assembly inthlanpui-ah khan Mizoram electoral roll-ah Bru vote nei mi 11,000 chuang hret an awm a. Tripura state election commission-a thawkte chuan Tripura-a Bru vote nei thei zawng zawng hi 21,703 vel niin an sawi thung.