Bethlehem Vengthlang Branch YMA-in an veng chhunga chengte chhinchhiahna Census Passport Photo Computerised chu hun eng emaw chen an thawh hnuah an zo a, ni 26.05.2017 7:30 khan Bethlehem Vengthlang Table Tennis Club Hall ah Central YMA President Lalbiakzuala chuan a tlangzarh a ni. Census Passport Photo Computerised hna hi kum 2012 atangin an thawk tan tawh niin Bethlehem Vengthlang Branch YMA Vice President C.Lalhmuliana chuan Zalen a hrilh a, hna hautak tak leh thlalak update zel ngai anih avangin tunhnaiah tlangzarh theih chauh niin a sawi a. Branch YMA chuan hemi kawnga hma la tur bik Census Sub Committee siamin chu mite chuan an thiam ang anga rim taka an thawh hnuah an peihfel thei niin a sawi bawk. Census Passport Photo Computerised chu a tangkai hle dawn nia sawiin data hi khuarel chhiatrupna lo thlen huna veng chhung mite chiang leh zuala inhriat tawn nan te, a awm zat hriat nan te, mitthi an awm pawhin an hming, kum leh thlalak te dah/hriat theih nghal zel anih dawn avangin inzawhbuai a ngai tawh dawnlo niin a sawi a. Mitthi an awm pawhin an thlalak zawnbuai ngai lovin mitthi board a tar tur an neih nghal mai dawn bakah social media (whatsapp etc) a tar tur pawh a awm nghal dawn a. Hei bakah hian mi bo leh ruang chhar chungchangah te, ruihhlo zuar leh mi sual man chhuah zung zung nan te pawh a tangkai hle dawn niin a sawi bawk. Bethlehem Vengthlang YMA hruaitute chuan an veng mite bakah ram dang mi leh hnam dang (vai) pawh an chhinchhiah nia sawiin hei hian dan leh thupek kenkawhna kawngah pawh nasa taka a puih an beisei tih an sawi bawk a. Hmun thenkhatah pawikhawihna a thlenin a titute an tlanbo daih chuan zawn an harsa thin a. Mahse an address kimchang leh thlalak an kawl dawn avangin misual zawnchhuah kawngah nasa taka a tangkai an beisei tih Zalen an hrilh bawk. Hetianga vengchhung mi leh sa chanchin kimchanga chhinchhiah hi Mizoram hmun dangah an la awmlo nia hriat a niin Bethlehem Vengthlang hi a hmasa ber an ni a. Veng lian an nih avangin hna pawh a hautak a, a senso hi Branch YMA in a tum vek a ni. Census Passport Photo Computerised hna thawk tur hian Sub Committee din a niin he committee hnuaiah hian Section 6 a section hruaituten anmahni huam chhung theuhah chhinchhiah leh thlalak kalpui hna hi an thawk a ni.