Zalen in kan ngaihsan em em 'thalai thawhchhuah nei' ziak leh phawt ang aw. Tunhnaiah Thenzawl i zin a nih chuan khaw hnuaiah 'chakai showroom' i hmu hrim hrim ang. Dawr nghaktute chu a chhung leh a chhehvelah an tei suau suau chang an nei a, a then thuthleng seiah an hnar burh burh bawk ang a, a chang chuan pahnih khat chauhin an thut chilh thin bawk. An tum erawh a in ang khat hlawm a, an chakai man an dahkhawma, a huhova dah pawlh ni mahse ta ta awm lova hralh zawh a ni tawp mai- tunlai phai lam media in 'Nghah loh dawr' khawvel hriata an rawn vawrh thar nen' a boruak ken' a danglam tam lem lo! Showroom dang nghaktute angin mam thin then lo mahse ' ka chanpual ka hralh chak chuan ka hlawka bonus thei mahna' tih rilru an puin a lang lova, an hralh zawhah an khai chhuah zat an insem leh mai a, an buai lo. Samlukhai leh Sialsuk chuan an khawhnuai kawng anah nen an chakai awt tla te chu an chhawp chhuak thin a, Thenzawl hnaih lamah 'group' dangin dawr an siam leh bawk a ni. 'Cheng 150/200 manin kan khirh tlangpuia, hmun 2  ah hian mi 40 bawr kan ni a, kan ngah tum chuan khai 100 dawn kan nei thei a, chawhrualin cheng 500 chu kan hum haw tlangpui a. Tih fuh tumin Rs 15,000-20,000 te kan lei a, fuh loh tumin 8,000-10,000 kan lei chhuak thei bawk,' thudawnna chuan tiin a sawi. 'Khawvar hmain awt chiah kan in en chhawk a, hmun 2 ah hralhin chhun dar 12 velah dawr kan thlen pui a, chutah chuan kan 'pack' nghala, dawr nghak tur kan in sawi fela, a neitu a awm loh pawhin a man kan in pe leh mai thin a ni’ tiin a sawi a ni. A sawi zel danin,  ‘Kan vaiin kan thut chilh hman lova, laklawh thila chhuak an awm pawhin an chanpual kan lo kawl sak mai thin,' tiin thangkhat lian dawn Sialsuk chakai khawrh thin chuan zawhna chhangin Zalen a hrilh. Sialsuk chakai khawrhtute hi 'chheh leh vel' humhalhah hriatna an nei tha in a lang a, an hnena thudawn dan chuan chakai te chu awt chiaha tla vek a ni a, hrai an duh lo bur a ni. 'Kan lui te hi kan humhalha, hrai ta ila tun ang chen hi zawrh tur kan nei dawn lo tih kan hria a, kan hrai a nih chuan a rei loteah a rem anga, an lo kir leh nan thangkhat lian kan nghah a ngai ang,' tiin thudawnna chuan Zalen a hrilh. Sialsuk hian vannei intihna lai an nei a, lui khat chauh an nei lo, lui engngemaw zat kal pawh theih a ni a, km 20 bialah an chiah theih phah a, zan 2 danah awt tla an en mai thin. 'Lui khat leh suar khata kan chiah khawm vek lova, lui hrang hrangah aiawt kan chiah a, mual hrang hrangah kan chhuak a, kan dawr bungraw zawrh tur hi kan khai khawm mai thin a ni, an ti. Helai hmuna chakai zuar tute hi an thurin-ah an rinawm hle ni tur a ni, an ta an sawi duh tlat loa, an zinga hmelhriat nei tan pawh dawr a buaithlak lek lek thin a. 'Chakai zuar zingah ka thian tha tak tak an awm a, anmahni ngei dawr duh chang pawhin a manganthlak zawk thin. An ta kha an sawi duh tlat lo. Duhsak ve tum pawhin tihngaihna a awm chuang lo, mi dang ta kan thlan fuh pawhin lawm takin min thlah liam zel mai a ni. A chang chuan chakai khai khat lek la awm kha tlangval paruk pasarih lai ten an lo thutpui a. An hman hrim hrim vanga thu khawm ni lovin, a la hralh zo ve lo awm chhun kha an hawsan duh lo va, a hralh zawh ve hma chu an thutpui ve ngat ngat mai a ni,' tiin helai hmuna chakai lei thin chuan a sawi bawk. World Bank Road a tlang tirh atang khan hmun khata chakai dahkhawma zawrh hi chin chhuah tan niin Sialsuk khua a cheng mi pakhat Hruaia chuan Zalen a hrilh bawk a. A hma chuan khawlaiah te kawtin lirthei chuangte hnenah an zawrh bakah an theihna hmun dangah an zuar kual thin bawk a, tha leh hun a heh a, tun hmun khata zawrh hi a lo piang ta ni.