Mizoten Kut kan neih zinga ngaihhlut hlawh ber leh tunlai hun thleng pawha kan uar ber thin Chapchar Kut chu tluang taka neih zawh a ni leh ta a. Mipuite pawhin kan hlutin a lawmna pui ber Lammual-ah pawh kan khat tlat a, hei mai ni lovin ramdang atang pawhin kut hmang tur hian mi eng emaw zat an lo tel thei a ni. Chapchar kut ti hlawhtlingtu pakhat chu Mizo thuama kan inthuam leh kut hman niah chuan eng emaw ti tala Mizo zia pholang thei tur thuamhnaw kan inbel hi a ni awm e. Kut denchhen hian Mizo thuam siamtute pawhin tan an lain an thawmhnaw pawh tum dang zawng aiin an hralh tha zawk thin. Hnam Chhantu Pawl President Ramhmangaiha chuan Zalen zawhna chhangin, “Ni dang zawng aiin kut dawn bawrah hian kan in hralh tha a, a let 3 deuhthaw ten kan hralh tam zawk a, kan thil hralh zingah kawr a kal ber a ni,” a ti. Chapchar kut lawmna a kal pa pakhat chuan khawpui laili nilo khawi hmun emaw Kut leh mipui punkhawmna hmun tur siam nise tha a tih thu a sawi a. Lammual chuan mipui a dawl zo meuh tawh lo nia a hriat thu sawiin traffic chungchangah pawh harsatna a awm thin avangin sawrkarin hmun remchang dang nghaihtuah thei se a duh thu a sawi. Chanchinbumi pakhat pawhin kut hman niah traffic jam a nasat thin avangin Pisa tlang (Treasury Square) leh Dawrpui inkar ang chu no vehicle zone-ah puan mai ni se a duh thu a sawi a. Hei hian mipui chetvel a tih awlsam dawn bakah traffic harsatna pawh a tihziaawm zawk a beisei tih a sawi a. Pisa tlang leh Dawrpui inkarah mipuite mamawh hrang hrang zawrh nise thaa a hriat thu a sawi bawk. Kut hmangtu nu pakhat chuan eng emaw thiltihna reng rengah thusawi a tam thin lutuk nia sawiin tun aia nuam leh mipui tel tam theihna tur zawnga ngaihtuahna sen nise a duh tih Zalen a hrilh a. Kut hman chu Mizote lam chi hrang hrang leh incheina te thangthar zawkte hnena pholanna hun tha a nih avangin chhunzawm zel nise a duh tih a sawi bawk.