Sap hovin phuahchawp thawnthu ngaihnawm tam tak an nei a, chu thawnthu te chu kan naupang te pawhin ngaihnawm an ti a, hriat pawh an hre bel hlei hlui a, hmeichhe naupang inkawm ho chuan snow-white-i lem te an chang a, Cinderella anga hmeichhe vannei nih te an chak thin. Mipa naupang ten Superman a thuam leh Spiderman a thuam te an inbel a, chu chu kan ni tin nuna bet a ni tawh. Vana Pa hall kawta Vana Pa lim fate enpui vang vang kan tam ka ring lo a, kei ngei pawh hi chung zingah chuan ka tel. Kan fate’n Tualvungi thawnthu aiin Cinderella chanchin an hre bel fe tawh zawk. Si-chang-neii aiin Mermaid thawnthu an chiang zawk a, Tleng-parela aiin Captain America an hre chiang fe. Mizo nula hmeltha Chhingpuii chanchin phei hi chu kan tleirawl zingah hian hria a bar pawh an awm a rinawm tawh lo a; mahse, a thlan chu Aizawl chhak lawk Chhingchhip khaw dai mai-ah khian a awm asin. He hmun thlen hma lawka MIFCO ho enkawl Food Park a han chawlh paha han lenkhawthawnna tham lek a ni. Sailo Lal thlah pahnih chhak leh thlang lam inhmuh thiam loh avanga tuartu nula hmeltha Chhingpuii hi Lasavunga thlah te leh Manga thlahte inhmuh thiam lohna tuartu, a thlan pawh Chhingchhip khaw daia la awm ngei a ni a; mahse, he nula hmeltha thlan hian ngaihsaktu a nei lo. Chhak leh Thlang indona kha thutiama din loh vanga indona a nih rualin a boruak tisangtu ber pakhat chu ‘Hmeichhe inchuhna’ vang a ni a, Troy indona anga Achaeans (Greeks) lal fapa Paris of Troy-a’n Sparta lal Menelaus nupui Helen-i a chhuhsak ang chiah kha chu ni chiah lo mah se, Nisapui lal fanu Tuali inchuhna kha a boruak tisangtu a ni a, Vanhnuailiana’n a fapa Liankhama hnenah ngei thurochhiahah a hmang a ni. Chumi indo kal zelah Tachhip hovin Ruanzawl an run tumin Chhingpuii feh kal tur hi thah a ni a, that lo tura a ngen lawm lawm hnuah a lu hi tan sak a ni, hei hi kum 1879 leh 1880 bawra thil thleng a ni. He nula khawngaihthlak Chhingpuii thlan hi riang takin National Highway 54 kawng kam lawkah awm mah se, panna mumal pawh a nei lo. Kum 2013 khan Art & Culture Department chuan 13th Finance Commission sum hmangin a panna kawng hi an siam a, mahse he kawng hi tunah hian mumal taka hmuh tur a awm tawh lo. Chhingpuii thlan hi tlawh chakawm tak a nih theih nan hian Chhingpuii hi tunge a nih tam tak hian kan hre lo a, kha nula hmeltha, a lu an tansak hnu ni sarihnaah pawh a heh la vam ham khawpa nula hmeltha kha sap hovin Snow-white i chanchin an thehdarh anga thehdarh chu ni se he Mizo nula hmeltha thlan pawh hian hei ai chuan tlawhtu a ngah ngei ang, a thlan kawng khi tha taka enkawl chu ni se, tun ai hian tlawhtu pawh an tam ngei a rinawm bawk. He thlan piah lawkah hian Food Park ram em em mai chu a awm a, he hmun hi thei leh thlai tharchhuak hnem an nih avangin he tlangdungah hian a tirah chuan dah ni khan ka hria. Dah a nih tirh kha chuan he ‘Food Park’ tih hming hi chu a pu chiah lo a, theitui leh thlai eng engmaw sawngbawlna hmun a ni. He hmuna tharchhuah pawh hi an department dawr, Canteen kual, Dawrpui-ah sawn lei tur chu a awm. Food Park tih anih hnu hian engtianga food park a nih dan erawh ka hre chiah lo a, a bul hnaia feh haw ka tawh te chuan chutianga eitur a awm mai pawh an hriat loh thu in min chhang a, an sawi ang a nih chuan mi rama food park nen chuan a inang lo deuh a ni mai awm mang e te ka ti ta deuh a, Chhingpuii thlan kawng khi siamthain tlawh ta ila, a bul maia Food Park a chawlhna tur erawh chu a la awm hmel ta chuang loh a nih hmel. Tun hnaiah Nimbu sawr a, a bottle a zuar eng emaw zat Mizoramah pawh kan nei ta nual tawh a, Mizo pa kutchhuak Nimbu tui bakah khan tharchhuah tam lem loh Leechi tui thlengin Aizawl-ah lei tur a awm a, heng ho hian an hlawhtlinpui hle a, an bungrua sem pakhat chuan order pek sen loh chang an ngah thu Zalen a hrilh. Sorkar hnuaia Corporation hrang hrangin an chawi reng laiin mimalin an hlawkpui thei a, mimalin lirthei an dinchhuahpui theih laiin sorkar chuan a chawibelh zel mai bawk si. Chhingpuii thlan kawng nuam taka an siam hunah food park dik tak pawh a lo awm hman tawh ang a, kan han tlawhin kan han chawl dawn nia.