ZALEN December 3, 2023 : Tunhnai hun engemaw kalta atang khan China ramah chuap natna chi khat a leng a, he hrileng hian ngaihven a hlawhin Covid-19 ang deuha thihna thlentu anih mai hlauhthawnna a lian hle a. World Health Organisation pawhin a ngaihvenin China thuneitute a be pawp reng a, mahse mithiamte chuan thil hlauhawm lutuk ni lo turah an ngai.

China rama hri leng hi mycoplasma pneumonia nia hriat a niin hei hi a bikin naupang lamin an tuar na zual a, nausen thi an awm nual avangin sawrkar laipui pawhin a ngaihven a. Mahse Ministry of Health & Family Welfare chuan tun dinhmunah chi-ai na tur a awm lo tih sawiin chutih rual erawh chuan mipuite chu engemaw thleng palh thei lakah erawh lo inbuatsaih tura a duh thu an sawi a ni. All India Institute of Medical Sciences a senior doctor te chuan China rama thawkna lam natna leng chu, thlasik laia hrileng tlanglawn a ni a, Covid te anga hripui leng ang chi a ni lo tih an sawi.

Mithiamte chuan Covid-19 vangin China ah inkhuahkhirhna a nasa a, lock down hmangin nasa takin an inkhuahkhirh a. Tun hi lock down thlahdul hnua thlasik hmasa ber a ni a, lockdown avanga an taksa in natna a do theihna a tlakhniam vang leh an chhuah tlem bawk avangin hetiang hi an tawng ta niin an ngai.

ZALEN zawhna chhangin Integrated Disease Surveillance Project (IDSP) a State Nodal Officer Dr. Pachuau Lalmalsawma chuan, "Tun dinhmunah chuan han manganna tur a awm lem lova. Mahse khawvel hi kan inpawh tlang tawhin Mizo sumdawng te pawh China thleng an awm nual a, chuvangin fimkhur erawh a tha hle a ni," a ti. Hri laka invenna chungchangah Covid CAB chu a pawimawh ber tih sawi bawkin, "Covid-19 hri len laia kan invenna hrang hrang ina awm tam, mi dang nen inhnaih lova awm leh hmai tuamna hman that te kha uar ila a tha ber a. Hei hi WHO pawhin mipuite awm dan tura a duh a ni," a ti.

Hri enkawlna chungchang zawhna chhangin Dr. Sawma chuan, "Inenkawl dan vak a awm hran lo a, hritlang ang deuh a ni a. Hritlang pawh hi virus vang anih chuan enkawl vak ngaihna awm lovin a dam ve leh mai a. A pawimawh berah chuan taksa tihchak hi a ni mai," tiin a sawi a. Champhai district chhunga pneumonia hri leng nasa leh thi pawh an tam nia sawi awm chungchang chu zirchian an tum niin a sawi bawk.

Kum tin thlasik tan tirh hian vansanga boruak bawlhhlawh awm hi lei lamah a lo tla thla thin a, chu chuan tlang hrileng te rawn thlenin hritlang pawh hi a pung thin niin mithiam pakhat chuan a sawi ve bawk.