Internet khawvelah hian internet a tangkai viau tawh lai leh technology tharte kan hman tangkai viau tawh lai hian sual rawngbawl nan leh mite bumna leh rawkna atana hmang pawh an bang chuang lo a. Mipuite kan fimkhur a tul hle a ni. Mizoram Police lama cyber crime lam khawihtute chuan tunlaiin an theih ang angin school, college leh YMA branch hrang hrangah te mipuite hrilhhriatna (awareness campaign) an buatsaih thin a. Mipuiten an hriat tam a pawimawh zia an hria a, tuna an hmalakna neih tawh te pawh an la duhkhawp lo hle niin ZALEN an hrilh a ni. Engtin nge miin internet leh tunlai thiamna changkang tak hmang te, mobile phone hmangtein sual rawng an bawl a, mi an rawk thin a, engtin nge dan an bawhchhiat i han belchiang dawn teh ang. Police CID Crime hotute chuan tunlai hian mobile hmanga mi biaa mi bum ching an tam hle niin an sawi a. Hetianga mi bum thinte hian mi biain an ATM card a thih dawn thu te, Aadhaar nena thlunzawm a ngaih thute an sawi a. Thenkhat chuan mahni kalchhuaka buaipui chiam ai chuan a awlsam ringin an card number pawimawh hrang hrangte an lo pe a, hemi hmang hian pawisa an laksak ta thin a ni. Tunlai hian Facebook, WhatsApp, Instagram leh a dangteah hian sumdawnna ti an tam hle a. Heta thil lei tamtak hi bum an ni thin niin police hotute chuan an sawi a. An chah ang lo thleng lo te, bungrua hrim hrim lo thleng lo, a man pek vek tawh site a awm bawk. Hnam dang, a bik takin sap thlalak profile picture-a hmangte hian Mizo hmeichhia rawn be tlangnelin an inkawmngeih tak tak hnuah thiam taka bumin sum an laksak thin bawk . “Hei hi chu an duhthu ngeia pawisa an pek vang nge an zak deuh nge an rawn report ngai vak lo,” tiin police hotute chuan an sawi a ni. Mi sualin sum an laksakte hian darkar 24 ral hmaa an report chuan an then chu pawisa an lakkirsak leh thin niin police hotute chuan an sawi a. Bank hotute leh sum transfer-na lama thuneitute hian mi sualin pawisa an la lakchhuah loh chuan sum transfer tawh chu an tikir leh thei thin a ni. Bank account hralh ching an awm tih sawiin police hotute chuan bank account hralh chu sual ni lo mah se kha account kha dan bawhchhiatna atana an hman chuan account hming putute kha dan bawhchhiatna lama puitu anga man theih an ni. Changkanna in nun a tih awlsam viau lai hian sual duh tan chuan chhui chhuah hleitheih loha pawikhawihna leh mi bumna remchang a ni ve leh a. Bank leh police-in mipuite hnena tih tur leh tih loh tur an sawi thinte ngai pawimawh a, fimkhur a tul hle  a ni.