Aizawl: New Delhi leh National Capital Region an tih (Gurgoan, Noida, Ghaziabad, Faridabad, Sonepat leh Meerut)-ah ringawt khuan India hmarchhak mi nuai 11 chuang an awm a. A tam zawk hi zirlai leh mi hnuaia hnathawk an ni. Damlo ve thei an ni a, inenkawlna a hautak si avangin sum tam tak an seng a, harsatna tam tak an tawk thin a. He harsatna hi nasa takin a kiam dawn ta a, damdawi in lian 31 zet intiam rual chuan hmarchhak mi damlo an enkawlte senso chu 30% atanga 15% thlengin a tihtlawmsak bik tawh dawn. Delhi-a ZALEN palai, Bruce Thangkol hnen atanga thu dawn danin Delhi leh a chhehvela hmarchhak mi khawsa tam zawk hi zirlai leh mi mal hnuaia thawk an ni tlangpui a. Insurance an nei lo va, sorkar hnathawk angin Central Government Health Scheme (CGHS) an hmang thei lo bawk a. An damloh nikhuain harsatna lian tak an tawk thin a, zirlaiten in lama an nu leh pate pawisa an chah chawp a ngai a, hnathawk te pawhin an inenkawlnaa an insen nasat avangin in lama an hlawh thawn haw tur an neih loh châng a tam thin bawk. Tunah erawh chuan heng zirlai leh mi mal hnuaia thawkten harsatna an tawh thin chu sutkian a ni tawh dawn a, damdawi in lian leh tha tak tak 31-te hian hmarchhak mite tan inenkawlna man nasa takin an tihniam ta a. Hei mai a ni lo va, heng damdawi inte hian nileng zankhua (24X7) biakpawh theih leh rawn theih tur, hmarchhak mite harsatna ngaithla tur, Nodal Officer an ruat theuh dawn bawk a ni. Zalen palai hnena ICP Robin Hibu, IPS, Nodal Officer for North East People, Delhi sawi dan chuan hetiang damdawiin ten an tana an inpekna tur ruahmanna thar an siam avanga lawmthu sawi nan hian Delhi-a hmarchhak mi chengte chuan Lawmthu Sawi Inkhawm (Thanksgiving Function) an huaihawt dawn nghe nghe a ni. Lawmthu Sawi Inkhawm hi July chawlh kar 2/3 na hun remchang ah hman a ni dawn a, hetah hian damdawi in 31-a CEO, CMD, MD theuhte bakah hmarchhak atanga MP ni lai te, North East MP Forum-a Chairman te, Delhi-a hmarchhak tlawmngai pawl te, hmeichhe tana thawk te, hnam bil hruaitu te, Zirlai Pawl hruaitu te, Delhi-a hmar chhak state Bhavan theuhva RC te pawh an sawm dawn a ni. Hmarchhak mite tana thu lawmawm tak hi IGP Hubu chuan a tam thei ang ber vantlang inbiakpawhna hmanga hmarchhak mite hnena vawrh darh turin a ngen bawk a ni.