Tunlaiah chuan zirna hi a leiin kan lei tawh a, chhungkaw harsa deuh pawhin rual kan awh ve tho avangin zirna in tha chu sum sen tam deuh mah se kan pan lo thei lo a. Neih thinglung khawng pawhin state pawnah zirna sang chhunzawm turin kan tu leh fate kan tir a, state pawn khawpui ah chuan Shillong hi Mizote pan tam ber khawpui a ni hial awm e. Shillong-a fate dahtu pa pakhat chuan, “Ka fate tan hian rual ka awh em avangin theihtawp ka chhuah a, state pawna kan pan theih awlsam leh sum sen tlemna ber chu Shillong hi nia ka hriat vangin ka fate zirna atan hian ka duh a ni,” a ti a. Shillong chu kal pawh mai a awlsam bakah zirna pawh a tha a, saptawng a tuallen bawk avangin an chhungkaw tan chuan a tha ber nia a hriat thu a sawi. St.Edmunds College-a naupang dahtu nu pakhat chuan, “Mizoramah chuan saptawng a tualleng lo lutuk hi tha lo ka ti a, ka faten saptawng leh Hindi an thiam nan mai bakah an khawhawi zauhna atan state dangah ka kaltir ve a ni,” a ti. A tlangpuiin Board exam result hi May thlaah chhuakin June thla tir lamah class tan a ni thin a, May thla tawp lam chu admission tih runpui lai a ni. Hetih hunlai hian khawpui hrang hrang Shillong, Delhi, Kolkata, Pune, Bangalore leh Guwahati te chu Mizo thalaiten an pan tam zualna khawpuite an ni a. Heng khawpui hrang hranga Mizo zirlaite hian an contact number te tarlangin admission tih tumte an puih theih thu social media hmangin an puangchhuak thin a, zirlaiten an hmang tangkai thei hle. Shillong MSU hruaitu pakhat chuan, “Kan college-ah hian Mizo zirlai a tam thei ang ber lut se tih hi ka duhthusam a ni a. Chumai bakah admission tih dawn hian a bangbo ve theih hle mai a; chuvangin, theihtawpa lo puih hi kan duh a, a mamawhte chuan inthlahrung lovin min rawn pan zel se ka duh a ni,” a ti. Shillong-a an fate lehkha zira dahtu pa pakhat chuan admission chungchanga zirlai hruaitu ten an pui thin chu lawmawm a tih thu a sawi a. “Mahni chet thanna hmun lova thiltih hi a buaithlak a, chutih kara thatho tak maia zirlaiten min buaipui zung zung hi a lawmawm ka ti a. Lawmman sum leh pai pek tum pawhin an duh bawk si lo va, a ropui tak zetin ka hria a ni,” a ti bawk. Shillong hi Mizo zirlai tam berte fuankhawmna hmun a ni a, chutih rual chuan in luah leh private hostel a awm hi zirlai tam ber an ni a. A hautak avangin zirna sang zawk beisei mi tam tak an kal theih loh phah a; chuvangin, sawrkar hian tuna awmsa Boys leh Girls Hostel dang hi buatsaih leh thei se zirlaite phurrit nasa taka a chhawk dawn bakah tun ai hian lehkha thiam an chhuah tam lehzual a beiseiawm.