Sawrkar laipui chuan pawisa note hman tihtlem nan leh tunlai thiamna hmanga pawisa inthawn/inpek chawi lar nan nasa takin hma a la a. He an hmalakna, Digital India tia vuah hi July 1, 2015 khan Prime Minister Narendra Modi-a’n a hawng a, he hmalakna thar hi India mipui chuan an zawm tha hle.

Digital India hnuaiah hian tangkafai hmang lova sum leh paia indawrna chu kalpui a niin thil leina atan te, bill chi hrang hrang pekna leh pawisa inthawnna atante tangkai taka hman a ni.

Digital India hnuaiah hian sum leh pai inpekna chi hrang hrang eng emaw zat a awm a, chung zingah chuan banking card, UPI, internet banking, point of sale, mobile banking te hi a lar zual a ni awm e.

Tunlaia pawisa inpekna langsar tak chu Unified Payments Interface (UPI) hi a ni a. Hemi hnuaiah hian bank account hrang hrangte chu mobile phone application hmanga thlunkhawm a ni.

UPI hi India ramah hlawhtling taka kalpui a ni a, chhinchhiah danin January, 2023 thleng khan UPI hmang thei bank 385 awmin sum chevel zat chu cheng vaibelchhia 12,98,726.62 a tling a ni.

Pawisa note hmanga sum inthleng tawnnaah hian eirukna chi hrang hrang a awm theih avangin sawrkar laipui chuan sum faia inpe lova account lama thunsak pawh a uar chho deuh deuh a. Ni za inhlawhna, gas subsidy leh thil dang chi hrang hrang pawh sum faia pe lovin account lamah a dahsak tawh a. Hei hian eirukna leh induhsakna awm theite a veng a ni 

Sum fai hmang lova indawrna hi Mizoramah pawh hlawhtling taka kalpui mek a ni a, mi tam tak chuan an mobile phone chu thil lei nan an hmang tangkai hle.

Mizoramah chuan sum fai tel lova indawrna zingah Gpay hi a lar leh mipui tam berin an hman a ni a. Mizorama dawr mai bakah kawngsira chawhmeh leh nepnawi zuarte pawhin hmang tangkaiin an bulah QR code an dah a, anmahni dawrtute tan a tangkaiin sum fai keng lo pawhin an phone hmangin an lei thei a. Hei hi a zuartu leh leitu tan a tangkai hle.

Bank thenkhat chuan anmahni bank software ngei hmanga pawisa inthawn an duh thin avangin pawisa khawih velna Gpay leh a dangte hi a him tawk lo niin an sawi a; mahse, pawisa kalna hi chhui theih vek a nih avangin a him nia thudawn a ni.

Sum fai hmang lova indawrnaah hian pawisa chhia a awm ve loh avang te, mi sual lakah a him zawk avang leh a awlsam zawk avangin mipui ten an uar chho zel dawn niin a lang a. Hetih lai hian mi sualten an hman tangkai ve theih avang erawh chuan fimkhur a ngai hle thung.