Indian Oil Corporation (IOC) duhdanin mahni inlum ngeia gas hmuh theihna, ‘LPG home delivery’ chu kalpui mek zel a ni a, duhthusamin kalpui chak theih a ni lo va, Aizawl khawpui bikah chuan veng puma kalpui ni chiah lo mah se veng tam berah chuan online hmanga gas book hi kalpui a ni tawh.

ZALEN-in Food, Civil Supplies & Consumer Affairs (FCS&CA) Department thawktute hnen atanga thu a dawn danin veng puma gas home delivery kalpui tawh hi veng eng emaw zat an awm a, chutih rualin veng thenkhat chu home delivery leh point delivery la kalpui kawp an awm bawk tih an sawi.

Hetih rual hian veng tin deuh thaw-ah online hmanga gas book hi an awm tawh a, home delivery hian hma a sawn hret hret tih an sawi a. Tuna home delivery la kalpui lo veng pawhin kalpui an tum mek nia an hriat thu leh mipui atanga home delivery harsatna chhan ber chu consumer zingah subsidy luhna tur account leh Aadhar la thlunzawm lo an awm vang nia an hriat thu an sawi.

Mipui rilruah pawh home delivery duhna a lian chho telh telh nia an hriat thu sawiin tun atanga hun reilo te-ah Aizawl khawpuiah hman a nih ngei an rin thu an sawi bawk.

LPG Online refill booking & home delivery hi December 1, 2022 atang hman tan niin gas lak dawnin 8454955555-ah miss call tur a ni a. Gas la turten kan chenna address, ph no. etc. te a danglam tawh chuan update zel tur a ni.

KYC a fel loh chuan gas agent-ah kalin awlsam takin tih theih a ni a. A duh tan a man pek lawk theih a ni a, delivery boy-in a dah hunah tual chhung delivery charge Rs. 70/- aia tam lo pek belh tur a ni.

Subsidy luh dan check duh leh complaint duh tan https://cx.indianoil.in/EPICIOCL/faces/GrievanceMAinPage.jspx-ah en theih a ni.

IOC ruahman dan chuan consumer-ten gas an book atanga darkar 48 chhungin agent-ten an pe tur a ni a. Mizoramah erawh chuan a taka taka la kalpui vek a nih loh avangin harsatna a la awm deuh a, home delivery chungchanga lungawi lohna nei tan ph.no. 0389-2314375 emaw 1967-ah te thlen theih a ni.

Gas hi consumer-ten duh zat zat an lak theih rualin subsidy erawh kum khatah bur 12-ah bak a lut thei lo a. Gas hi tun dinhmunah bur khat Rs. 955 a ni mek a. Home delivery hi College Veng-ah a hmasa ber atan kalpui a ni.

 Home delivery hi tha a tih thu pa pakhat chuan sawiin, “Point delivery-ah kha chuan hun rei tak tak gas nghakin kan intlar a, a changin zinga lo thleng tura beiseite kha lo thleng thei lovin nileng deuh thawa nghahte a ngai a. Hei mai ni lovin hun rei tak kan intlar hnuah chan lohte a awm a, a chang phei chuan gas leak-te lak a ngai hial thin. Heng harsatna zawng zawng hi kan pumpelh theih avangin home delivery hi tha ka ti hle a ni,” tiin ZALEN a hrilh.