Khawvel ram hrang hrangah engemaw rikrum thil a thlen palhah mipui ten thuneitute leh anmahni puitu tur an biakpawh theihna tur telephone number siam a ni thin a. USA ah chuan 911 a lar hle a, UK ah chuan 999 hmangin India ramah chuan 112 hman a ni thung.

Rikrum leh chhiatna thleng palha biakpawh theihna tur Emergency Response Support System (ERSS) no 112 hi Mizoramah chuan mipui ten kan la hmang tangkai lo hle a, thuneitute chuan tun ai hian mipui ten hmang tangkai thei se an duh hle. 112 hi Aizawl Superintendent of Police complex ah dah a niin nileng zankhua (24 hours) an duty a, engtik lai pawhin harsatna nei tan biakpawh theih a ni. Aizawl bakah hian Pilot Project atan Champhai, Kolasib leh Lunglei ah te dah a ni bawk.

Emergency Response Support System thawktute chuan mipui ten harsatna an rawn thlen chuan an case a zirin a buaipuitute hnenah an thlen nghal zung zung zel niin Zalen an hrilh a. "Kangmei chungchang anih chuan fire department kan hrilh nghal a, naupang lam anih chuan Childline, chutiang zelin lirthei chetsualna anih chuan ambulance te kan be nghal thuai thin a ni," an ti. 

ERSS duty te chuan 112 chu tangkai taka hman tur anih laiin mi thenkhat uang thuanga be thin leh hresual palh an awm thin niin an sawi a. "Mi thenkhat ten uan nan call an awm thin a, hei hian emergency call lo kal tur tam tak a block thin avangin a pawi hle a. Hei mai bakah mi thenkhatin Airtel balance thunna 121 nen hriatpawlhin an rawn call thin bawk a. Ni khatah hian dan tlangpuiin call 300 vel kan dawng thin a, mahse heng zinga a pawi mawh chu tlem te chauh a ni," an ti bawk. 

Call an dawn thin chu a hunlai a zirin a inang lo tih sawi bawkin, "A tlangpuia lakin zu rui case leh chhungkuaa buaina siam hi a tam ber a. Thal lai chuan kangmei hi a tam leh bawk a ni," an ti. ERSS 112 hi eng phone atang pawhin a biakpawh theih a, Jio hmangtu te tan bik chuan an awmna hmun an hre nghal (location base service) thei a, company dangah erawh chuan hriat nghal theih a ni hrih lo a ni.