India ram chhunga inhnialna leh thuthang titam mektu Electronic Voting Machine (EVM) chungchanga Zalen palai zawhna chhangin State Election Commission hotute leh Aizawl Deputy Commissioner Office a Election lam hotute chuan EVM chu a him hle a an hriat thu Zalen an hrilh. State Election Commissioner chuan Zalen palai zawhna chhangin EVM chu himlohna a awm loh thu a sawi a, "Checking engkim tih \hin a ni a, check lai pawhin political parties te an awm vek a, Mara Autonomous District Council (MADC) inthlan lo awm turah pawh hman kan tum," tiin kan palai a hrilh. Aizawl Deputy Commissioner Office a Election lam hotute pawhin Election Commission of India (ECI) atanga thu thar dawn a nih loh chuan nakum inthlanah pawh EVM hman ngei a ni ang tiin Zalen an hrilh a. Tuna kawl lai mek pawh strong room ah \ha taka dah a nih thu sawiin, "ECI in a thara thlak vek tur an tih leh kan thlak vek ang a, ECI thu thu a ni," tiin Zalen palai an hrilh bawk. Thudawnnain a tarlan  danin Election Commission of India chuan Aam Admi Party (AAP) leh Bahujan Samaj Party (BSP) te a\anga Electronic Voting Machine rin tawk lohna dawng mah se EVM chu a rintlak thu March 16, 2017 khan an nemnghet a. Thudawn zel danin tunlai hian BSP te chuan EVM khawih danglam a nih thu an tlangaupui mek bawk a, Aam Admi Party pawhin ballot paper hman a nih theih nan nasa takin an nawr mek bawk a ni.