ZALEN August 6, 2023 : India rama rorelna in sang pahnih, Lok Sabha leh Rajya Sabha te chuan tun hnai khan Forest (Conservation) Amendment Bill, 2023 chu a pawm (passed) ta a. India president-in remtihna a pek hnuah dan (Law) a ni dawn a ni.

He bill hi Union Environment, Forest & Climate Change Minister Bhupender Yadav chuan July 26, 2023 khan Lok Sabha-ah pu lutin sawihona pawh awm lovin buai nuai nuai karah pass (voice vote hmangin) a ni a. Rajya Sabha pawhin he bill hi August 2, 2023 khan eptu party-te house atanga an chhuah vek hnuah an pass bawk a ni.

Forest (Conservation) Amendment Bill, 2023 hian Forest Conservation Act, 1980 chu a luahlan nghal tura ngaih a ni a. He dan thar hnuaiah hian ramri atanga km 100 huam chhunga sawrkarin hma a lakna tur hrang hrang - ram venhimna, rel kawng sial, motor kawngpui siam leh hmasawnna hnathawh kalpui turah forest clearance ngai lovin hna a thawh theih tawh dawn tihna a ni.

Tuna dan ding laiah chuan tuikhuah siam dawn te, kawng laih dawn te leh hmasawnna hna hrang hrang thawh dawnah a huam chhunga ramngaw te tihchhiat a nih dawn chuan Environment, Forest & Climate Change Ministry-ah forest clearance dil a ngai thin a. Chu mai bakah ramngaw an tihchhiatna man leh ramngaw dang siam lehna man, Compensatory Afforestation (CA) leh Net Present Value (NPV) te pek a ngai thin a; mahse, he dan hi hman a nih hunah chuan hetiang hi a ngai tawh dawn lo tihna a ni.

He dan thar hi tha titu an tam laiin sawiselna pawh a lian hle a. Mi tam takin hmasawnna hnathawh dawna forest clearance ngai thin chuan senso a tihsan mai bakah hnathawh a timuang niin an sawi a. Chutih laiin he dan thar duh lotute chuan hei hian tuna ramngaw kan neih mek chu nasa taka tihchhiat leh suasam a ni dawn nia sawiin a bikin tlangrama chengten an tuar nasa bik dawn niin an ngai a ni.

He dan thar hian international ramri atanga km 100 a huam dawn avangin Mizoram bakah hmarchhak state hmun tam zawkah chuan harsatna a thlen thei dawn niin mi thiamte chuan an sawi a. Ramngaw a chereu dawn avangin hei hian khawlum, tui harsatna leh ngaw atanga chak lakna kawngah harsatna a siam thei dawn a ni.

Mizoram University-a zirtirtu hnathawk pakhat chuan Forest (Conservation) Amendment Bill, 2023 chu tribal-te tan a hlauhawm hle niin ZALEN a hrilh a. “Hmasawnna (development) hmatheha hmanga tribal-te nuai ral tumna hmanrua niin ka hria a ni,” a ti.