November 27, 2023 : Sawrkar laipuiin a hmaa RSBY leh SECC list-a telte chauh golden card-a inziah luh theih tia thuchhuah a siam chu tun hnaiah NFSA ration card neite a huamtir tak avangin Ayushman card ‘golden card’ inziah luhna hi kalpui mek a ni a. Mi tam tak an inziak lut mek a, health department thawkte chuan inziak lut thei lo te chu an awmna hmunah kal chilhin inziah luhna hi kalpui zel an tum.

RSBY leh SECC list ang chuan Pradhan Mantri Jan Arogya Yojana ‘golden card’ nei thei hi a hma chuan Mizoramah chhungkaw 1,94,852 an awm a; mahse, NFA-te telh an nih takah chuan chhungkaw 2,16,584 a huam (cover) thei dawn ta a ni.

Golden card siam tur hian ration card leh aadhar card ken a, mahni ngei kal a ngai bawk a, inziah luhna man (enrollment fee) a ngai lo thung a. Inziak lut duh tan common service centre-ah leh Mizoram State Health Care Office (MSHC)-ah te inziah luh theih a ni.

Golden card-ah hian damlo pakhat chuan kum khat chhungin cheng nuai 5 thleng a bill let thei a, nuai 5 a pelh chuan damlo chuan anmahni in an tum belh a ngai thung a. Golden card hi tum khat siam a nih tawh chuan siam nawn a ngai tawh lo a ni.

Health department thawktute chuan golden card leh MSHC chu mi thenkhatten an hriatpawlh nia sawiin MSHC-ah chuan chhungkaw pakhat tan inziah luhna man a ngaih bakah enrollment fee hi kum tin tihthar (renew) zel a ngai a, MHCS-ah chuan kum khatah nuai 2 thleng bill theih a ni tih an sawi a. MHCS leh golden card chu tihkawp theih a nih avangin inziak lut kawp theite chu inziak lut kawp se an duh tih ZALEN an hrilh bawk.

Health department thawktute chuan golden card inziahluhna chu kalpui reng a la ni dawn tih sawi bawkin mi thenkhatten damlo leh tar chak lo tak takte hruaiin inziah luhna hmun hi an pan niin an sawi a. “Emergency bik a nih loh chuan rawn pan hrih lo se kan duh a. PHC leh CHC te chu an bialah team insiamin hetianga inziak lut turte chu hma la turin kan hriattir a. PHC leh CHC ten an kal theih lohna hmun pawh team insiamin an awm hmunah kal chilh vek kan tum a ni," an ti.

Golden card hman theihna hi Mizorama sawrkar damdawi in te bakah Aizawl-ah chuan Eye Care hospital, Adventist Hospital leh Nazareth Hospital-ah te, Champhai-ah Medaim Hospital, Lunglei-ah Serkawn Christian Hospital, Lawngtlai-ah Lairam Christian Medical Centre (LCMC) leh Christian Hospital-ah te hman theih a ni a. Heng bak damdawi in-ah te chuan golden card package hi hniam an tih avangin damdawi inten an hmang lo a ni.