Tunlai titi-ah Mizoram Gorkha chengte OBC (Other Backward Classes) chungchangah sawi a tam hle a. He thil sawi thar leh a nih chhan hi tun hnaia Central YMA thuneitu sang, CEC thukhawmin Gorkha-te OBC quota pek an duh loh thu an sawi atang leh NGO Coordination Committee-in an duh loh thu thuchhuah siama an tar lan leh vangin a ri thar leh a. Gorkha OBC chungchangah hian inhnialna awmin pek mai duh leh pek duh lo pawl an inthen ni berin a lang.

Article 340-ah chuan Scheduled Caste leh Scheduled Tribe-a tel lo hnam, OBC-te dinhmun zira an harsatna hrang hrangte sutkian a nih thei nan commission din a remti a. Chutiang chuan kum 1953 khan First Backward Classes Commission a din a; mahse, an rawtnate chu pawm a ni lo.

Kum 1977-a Janata sawrkar khan Mandal Commission dinin he thil zirchianna hi an nei a, commission hian Mizorama Gorkha-te pawh OBC-a tel tur hian a rawt a. OBC-a Gorkha hnam dah leh dah loh hi sawrkar thu a ni a, Mizoram sawrkar pawhin he thil zir chiang tur hian permanent body dinin an zirchianna hi sawrkarah an thehlut tawh nia thudawn a ni.

OBC chungchangah hian Mizorama piang leh sei lian Gorkhali pakhat chuan sawrkar hian Gorkhali-te chungchanga permanent body rawtna chu pawmin Central List of OBC-a telh a nih thei nan hma min laksak se ti chu Mizoram Gorkha-te ngenna a ni a. “Gorkhali-te hi Central List-a OBC-a puan kan nih chuan Central sawrkar hnuaia hna leh zirna ina 27% hi hauhsak kan ni ve thei dawn a. 27% hna hauhsak hi central sawrkar hnuaiah chauh kan beisei a, state sawrkarah chuan engmah kan beisei dawn lo tih pawh ziakin kan tiam tawh a ni,” a ti.

OBC tan 27% hauhsak chu Gorkhali-ten an hman (enjoy) theih loh vangin Mizorama central sawrkar office-a hnate chu state danga hnam dangten an luah khat thin nia sawiin, “27% hi hauhsak pawh ni ila Mizoram Gorkhali-te ta tur tihna a ni lo a, hmun hrang hranga OBC-te nen kan inel a ngai tho dawn a. Kan chanpual tur anga ngaih ngawt hi a dik lo a ni,” a ti bawk.

OBC reservation-ah hian Creamy Layer tih a awm bawk a, Class I officer fate, doctor leh engineer fate leh kum khata nuai 8 aia tam lalutten reservation hi an nei thei dawn lo va, a taka chhawr chu a harsa tak takte chauh an ni dawn niin a sawi a. Kum 1950 chin hma lam atanga Mizorama cheng leh khawsa chhunzawm Gorkhali leh an thlahte hi tunah hian mi 8,000 bawr vel an awm nia thudawn a ni.

Hetih lai hian Central YMA hruaitu pakhat chuan Gorkhali hnam OBC pek chu kan ram leh hnam tan a him lo tih ZALEN a hrilh a. “Gorkhali tan hian sawrkar laipui hnuaia hnaruak awmah OBC quota hi pe ta ila nakin lawkah chuan state sawrkarah an dil (claim) ngei ang a. Chutih hunah chuan hnalakna reng rengah quota an neih tawh dawn avangin lak tel zel an ngai tawh dawn tihna a ni a. Hei mai bakah an awm bitna khua/veng-ah village council leh local council-ah an tan reservation siam a ngai tawh dawn tihna a ni bawk a. Hei hi kan ram tan hian a him lo niin kan hria a ni,” a ti.

State dang dinhmun thlir chunga thutlukna siam an ni tih sawi bawkin Gorkhali mi 70,000 vel chenna Nagaland pawhin OBC dinhmun an la pek loh avangin Central YMA chuan fimkhur tul a ti hrih niin a sawi bawk.

Pa pakhat chuan Gorkhali tan OBC pek chu pawi a tih lem loh thu ZALEN a hrilh a. “Kan ram zirna in hrang hranga OBC quota hi state pawna OBC-te hian an rawn hnawh khat tho tho a, hengho nen inel tura Mizoram Gorkhali-te teltir ve hi a hlauhawmna ka hre lem lo. Kan ram Gorkhali-te hi India independence hunlai atanga lo awm tawhte an niin hmun danga han inbengbel leh tur an ni lem lo a, tlema dinhmun duhawm deuh zawka dah ve hi chu an phu ve hle in ka hria a ni,” a ti.