Tunlaia thangthar ten an ei nasat em em, drugs leh zu ang ema thil pawi a ngaih ni si lo, mahse taksa tana thil pawi tak thlentu chu Gutkha hi a ni awm e. Thalaiten an ei nasa a, dawra zawrh khap ni mah se lei tur a awm reng tho. Gutkha product zingah chuan Shikhar hi a lar ber leh Mizoramah chuan ei nasat ber a ni awm e. Aizawl Civil Hospital-a Casualty duty Doctor te chuan Shikhar ei vanga damdawi in pan an awm deuh reng niin Zalen an hrilh a. Shikhar chu taksa tan a pawi nia sawiin pumpui lawng, luakchhuak, luhai leh thil dangten a thawk thin tih an sawi a. Hetianga an awm tawh chuan an natna hi a dam mai mai thei tawh lo nia sawiin tih loh/ei loh a him ber niin an sawi bawk. Mizoram State Tobacco Control Society (MSTCS) thawktute chuan tunhnaiah thalai ten Shikhar an ei nasa chu pawi an ti hle tih an sawi a. Gutkha chu Food Safety and Standards Authority of India dan hnuaiah khap tlat a ni tiin remchang hmasa berah beipui thlak turin an inbuatsaih mek niin Zalen an hrilh bawk. Sports Association-a hruaitu pakhat chuan an naute zingah a ruka Shikhar ei an tam hle tih a sawi a, heng mite hi infiamna ah pawh an tangrei thei lo bik nia sawiin pum nuamlo, luna leh thildang insawiselna pawh an nei nasa bik nia a hriat thu Zalen a hrilh. Aizawl khawpui damdawiin pakhata duty Nurse chuan a thiante zinga Shikhar eite chu an tha a fei lo bik hle niin a sawi a. Operation Theatre ah te hun rei tak tak ding chunga duty te a ngai thin a, heng hunah te hian an ding rei thei lovin luhai ten an awm mai thin niin a sawi bawk. Mi thil chikmi thenkhat chuan tunhnai Independence Day leh Republic Day lawmnaa parade-a tel school naupangte an tlu nasa thin lutuk pawh an riltam vang chauh ni lovin shikhar leh thil dang taksa ngeih loh zawng hmawmsawm an ei thin vang nia a rin thu a sawi a. Parade naah kum upa, sipai bang kum 80 chuang te pawh harsatna awm lova an awmtluan theih laia darkar chanve em pawh school naupangte an ding tluan thei lo chu mak a tih thu a sawi bawk. Hetih lai hian dawrkai pakhat chuan Shikhar chu zawrh hreh mahse lei tum an tam thin em avangin an zuar ve tih Zalen a hrilh a. Shikhar chu a lang chuan an dah ngam lo nia sawiin lei tum an awm hunah an phawrh mai thin a. Zirlai mai bakah nu leh pa zingah pawh ei an thahnem hle niin a sawi bawk.