FEATURE : Heroin ah Mizoram sang fal

Admin - Nov 21, 2021

Ministry of Social Justice & Empowerment leh The National Drug Dependence Treatment Centre chhinchhiah danin heroin leh a kaihhnawih 'opiates' hman kawngah Mizoram chu a sang hle

India rama thalaite zingah Mizoram leh Punjab chu ruihna atana heroin hmang nasa state an ni a. Mizoram ah kumtin dan leh thupek kengkawhtu ten heroin an man pawh a pung tual tual bawk.

Ministry of Social Justice & Empowerment leh The National Drug Dependence Treatment Centre chhinchhiah danin heroin leh a kaihhnawih 'opiates' hman kawngah Mizoram chu a sang hle a, chawhrualin India rama opiates hmang chu 2.06% an nih laiin Mizoramah chuan 25.67% an ni thung.

Mizo thalai ten ruihna atana an hman lar ber heroin pawhin Mizoram a lut nasa niin mithiam te chuan an sawi a, Mizoram chu drugs inpekna kalkawng a la ni reng niin an sawi bawk. Mizoram Excise & Narcotics department ten damdawi zuar te hnen atanga heroin an man pawh a kum telin a pung chho a, kum 2016 ah kgs 4.039 an man a, kum 2017 ah kgs 6.186, 2018 ah kgs 8.716, 2019 ah kgs 12.596, 2020 ah kgs 11.710 te an man a. Kum 2020 a a tlakhniam chhan hi hripui vanga inkharkhip puan anih avang leh thenawm Myanmar atanga lut an tlem vang nia hriat a ni. Kum 2021 October thla tawp thleng khan END chuan heroin kgs 15.420 an man tawh bawk a, man loha chhuak hi a tam zawk fe tura ngaih a ni.

Excise m& Narcotics Department officer pakhat sawi danin kum 1970 vel atangin thalai ten ganja zuk an ching tan a, kum 1980 vel atangin ruihnan proxyvon an hmang tan bawk a. Kum 1984 ah ruihhlo hmansual vanga thi an awm tan a ni. Mizo thalai, damdawi hmangsual te thihpui tam ber chu proxyvon a ni a, mahse tunhnaiah he damdawi ah hian ruihna chi a awm tawh loh avangin an hmang lar tawh lo a. Tunhnai kum engemaw zat atanga thalaite thihpui tam ber chu heroin a ni. 

Mithiam te sawi danin India ram district zingah Kolasib, Champhai leh Aizawl district te chu drugs ti thar leh ti pun chakna ber zinga mi a ni a. Tunhma chuan Aizawl leh khawpui lian deuha cheng te a tibuai thin a, tunah chuan ruihhlo hi khaw hrang hrangin an buaipui tawh a ni. Hetih lai hian Europe leh hmun tam taka an buaipui 'Meth' erawh Mizo thalaite zingah ti an la awm lemlo nia thudawn a ni.

Aizawl pa pakhat chuan Mizoram thalaite zingah ruih tur zawng an tam lutuk chu manganthlak a tih thu leh hnam ral tur zia ni hiala a hriat thu a sawi a. "Kan thalai ten ruihhlo an buaipui ta lutuk hi engvang nge tih leh engtia tihrem tur nge tih kan zirchian a hun ta hle mai a. Khawtlang leh Kohhran thila nu leh pa ten hun kan hman tam lutuk avangin inchhung kan awp tlem a, hei hian kan fate nun a khawih pawi ta ni berin ka hria. Chuvangin nu leh pa te hian tun ai hian kan fate hi awmpui tam ila kan ziaawm theih ngei ka ring tlat a ni," a ti bawk.

Share now