NLUP Implementing Board in Assembly Annexe building-a NLUP Kutpui an huaihawt chuan mipui hlut a hlawh hle a, ni li chhung hian tlawhtu an thahnem hle. Kut hawn ni 6.3.2018 (Thawhlehni) atanga a khar ni 8.3.2018 (Zirtawpni) thleng khan stall hrang hrang (Food Stall tiam lohin) an inhralhna sum lak luh belhkhawm chu Rs. 48,06,681 a tling. NLUP Kutpui-ah hian Line Department 10 atangin a vaiin stall 75 hawn a ni a, Agriculture Department atangin stall 18, Horticulture Department atangin stall 12, AH&Vety Department atangin stall 4, Commerce & Industries atangin stall 18, UD&PA Department atangin stall 9, Soil Department atangin stall 1, Fisheries Department atangin stall 4, Sericulture Department atangin stall 4, Environment, Forest & Climate Change Department atangin stall 2 leh Transport Department atangin stall 3 siam a ni. Heng bakah hian NLUP partners eng emaw zahten stall an hawng bawk a, chung zingah chuan MEFCOF, MIFCO, MULCO, Hnam Chhantu Pawl leh a dangte an tel a, Stall hawn zawng zawng hi 95 a ni. Zalen palai chuan stall hi tum eng emaw zat a tlawh a, stall zingah hian MULCO, sangha zawrhna, zu fang leh Hnam Chhantu dawrte chu a lun zual deuh niin a lang a. Stall dang pawh a lunin dawrtu an thahnem thei hle a, chutih rual chuan thil lei lem lova tlawh mai mai eng emaw zat an awm bawk. Zu fang zuartu nu pakhat chuan ni 4 chhung an zawrh tur chu ni 2 an daih awrh chauh nia sawiin an hralh tha hle tih Zalen a hrilh a. MULCO dawr nghaktute pawhin an thil zawrh chu chawhma chhung velin an hralh zo deuh zel mai niin an sawi a. Hnam Chhantu neitu Ramhmangaiha pawhin ni danga Rs. 40,000 vel an hralh thin chu NLUP Kutpui lai chuan nuai chuang te an hralh niin a sawi a. Sangha lam pawh a man tihtlawm a nih avangin a lun hle a, a lei tumte pawh intlar a ngai hial a ni. NLUP Implementing Board chuan stall hawngte thilzawrh hi 20% in a subsidise a, heng sumte hi stall neitute hnenah an thil hralh zat azirin a pe let leh dawn a ni.