Sawrkar laipui chuan Act East Policy hmangin khawchhak ramte nena insumdawntawnna turin ruahmanna a kalpui mek a. India lawngchawlh hmun, Kolkata atanga bungraw phurh luhna atan Myanmar ram chhunga Sittwe lawngchawlh hmun chu chei thain heta tang hian Chhimtuipui (Kaladan) lui chu zawhin lawng tê zawk hmanga Paletwa thleng bungrua phurin, heta tang hian lirthei hmanga Mizoram kaltlanga bungrua phurh luh turin ruahmanna a siam a. He hna hi zawh a nih hun chuan hmarchhak state-ten kawngpui hmanga bungrua an lak luhna kawng chu nasa taka tihnaiin India thil siamte mai bakah khawchhak ram atangin bungrua eng emaw zat man tlawm zawkin a lalut thei dawn a. He kawngpui bakah rel hmanga bungrua thiar a nih theih nan hma a la mek bawk a, hei hian tunlai hian dodalna leh kaltlangpui ngei se tih duhna thu inchuh a awm mek.

Sawrkar laipui hmalaknain Bairabi thleng rel lian kal theihin siam a ni tawh a, Bairabi atanga Sairang/Sihhmui thleng rel kawng pawh siam mek niin kumin kum tawp lamah chuan zawh hman beisei a ni a. Km 51.38-a thui Bairabi to Sairang kawng siam nan hian a tirah Rs. vbc 2,393.49 ruahman niin a hnuah vbc 5,021.45-ah revise a ni a, a zawhna atan hian vbc. 6,527 vel ngai tura chhut a ni.

Bairabi-Sairang rel kawng hi Broad Gauge Railway Line tur a ni dawn a. Sairang atang hian Mizoram chhim tawp, Hmawngbuchhuah thleng rel kawng survey hna thawh nan hian Ministry of Railways chuan Rs. 33,15,60,293 a sanction a, he sum hmang hian rel kalna tur tak leh station awmna hmun tur survey a ni dawn a. Sairang atanga Hmawngbuchhuah inkar rel kawng hi km 223 ni tura ruahman a ni a, a senso atan hian Rs. vbc 15,006.96 ruahman a ni.

Ruahman dan chuan Sairang atanga Hmawngbuchhuah inkarah hian lei 110 awm tura ruahman niin leiverh 64 leh station 16 awm tura ruahman a ni a. Sawrkar laipuiin Mizoram chhimtawp thleng rel kawng a kaltir tur hi thlawptu an thahnem tluk zetin dodalna pawh a nasa hle.

Rel kawng hi kal ta se Mizoramin kawng tam taka a hlawkpui theih dawn laiin a chhiatpui thei dawn niin a lang a. Kan ram thar chhuah eng emaw zat hralh theih a nih dawn bakah mi tam takin hna an hmuh theih phah dawn a. Chutih laiin tuna ruahman anga rel kawng hi a kal chuan kan ram hi hmun hnihah a phel phawk dawn tihna a ni a, kan ram thing leh mau mai bakah environment-in nasa takin a tuar dawn a. Motor aiin rel hi thil phurh nan kan hmang tangkai tawk ang em tih zawhna a awm thei a, motor lian hi kal ta se kan hlawkpui zawk thei niin university mi thiam pakhat chuan a sawi.

Mizoram tawp thlenga rel kaltir hi kan ram tan a thatna aiin ramin a hlawkpui lohna tur a tam zawk nia hriain Mizorama tlawmngai pawl tam tak chuan an duh lo a. Hetih lai hian Lawngtlai district-a tlawmngai pawl lian ber, Young Lai Association (YLA) chuan sawrkar hmalakna chu kaltlangpui ngei nise an duh tih an sawi thung.

ZALEN zawhna chhangin Central YLA General Secreary Joseph Lalhmingthanga Chinzah chuan, “Sairang thleng chauh rel kaltir hi kan tan awmzia a awm dawn lo a. Sawrkar laipuiin Hmawngbuchhuah thleng rel kawng kaltir a tum hi kan thlawp a, a rang thei ang berin kaltir se kan duh a ni,” a ti a. NGOCC-ten chhimtawp thleng rel kaltir an duh lo chu an thlawp ve lo tih a sawi.