Aizawl bazara seat nei leh thil zuar tam ber te chu hmeichhia an ni a. Aizawl khawpui chhunga chawhmeh zuar, sa sat leh dawr hrang hrang nghakah hian hmeichhia an tam hle a. Mizo hmeichhiate hian hna an thawk hle niin a lang. New Market hotuten Zalen an hrilh danin bazar chhunga thil zuar tam zawk chu hmeichhia an ni a, a chanve aia an tam fe thu an sawi. "A zat chiah hi kan chhiar fel rih lo a, a tam ber hi hmeichhia an ni tih erawh kan hria a, mipa hi chu an awm ve zeuh zeuh chauh a ni,” tiin Zalen an hrilh. Zalen chuan bazar chhunga thingpui sen hang zuartu te a lo kawm tawh a, anni zingah pawh hian mipa pahnih awmin a bak chu hmeichhia vek an ni. Mizoram Synod Social Front chuan kum 5 vel kalta khan zirchianna an lo nei tawh a. Heta alan danin Mizorama kawng hrang hranga eizawng (hnathawktu) 2,054 an zir zingah 1,139 (55%) te chu hmeichhia an ni a, a bak 915 (45%) te chu mipa an ni. Heng zingah hian sumdawnna hmuna hnathawk zaa 71 chu hmeichhia niin an chhut bawk. Hetih lai hian Economics & Statistics in sorkar hnathawkte bihchianna a neih hnuhnung berah chuan Mizoram chhunga sorkar hnathawk zawng zawng chu mi 59612 an ni a, hetah hian mipa chu 41392 niin hmeichhia chu 18220 an ni ve thung a. Mipa chu zaa 69.44 an ni. Nimahsela, Economics & Statistics chuan sorkar hnathawkte pun chak zawng hi a zirchiang a. Hetah hian 8.35%-in census tinah mipa an pun belh a, hetih lai hian hmeichhia chu 16.17% lai a ni ve thung. Sorkar hnaah hian hmeichhia te hi an pung chak zawk hle tihna a ni. Tunah dinhmunah Employment Exchange Office-a hna zawng lai inziak lut mi 25,632 an tling tawh a. Heng zinga zaa 55 chu mipa an ni a, zaa 45 hmeichhia an ni. Hei hi Employment Exchange lamin an chhinchhiahna hnuhnung ber a ni. Mizo hmeichhia te hian hna an thawk nasa telh telh niin zirchianna hrang hrang atangin a lang thei awm e.