Tunhma chuan Grape khawpui tih hial a ni thin a, In 600 awmna khua Hnahlan a chhungkaw 500 dawn chuan eizawnna atan grape hi an hmang a. Chhun lamah khawlai reh duak khawpin grape huanah hna an thawk a, ina awm chu tar leh naupang chauh niin thalai ina awm chu thil zahthlakah ngaih a ni thin. Hei mai ni lovin ran ek pawh grape chawmna atan an hman thin avangin khawlai a thianghlim a, sum lakluh a pun avangin economics takin Hnahlan khua chu nasa takin a thang bawk. Mahse, heng grape huan te hi tunah chuan di leh phul hmun an chang ta. Hnahlan Grape Growers Society hruaitute chuan tun dinhmunah chuan an tan tihngaihna a awm lo nia sawiin ‘nghah tawp’ loh chu ti theih an nei lo niin an sawi. Mizoram ah zu phalrai anih atangin grape hralhna a hnawng tan niin Zalen palai an hrilh a. Grape huan chu di leh phul hmunah a chang zo nia sawiin grape zamna thirhrui pawh thirchhiaah hralh a ni a, a ban pawh tuah thingah an hmang tih sawiin, “Kan nu leh pa sawrkar a ngawi tlat a, kan tan hmalak zel a harsa a. Tuna sawrkar mek hian kan harsatna hi a hre pha lo niin kan hria a, sawrkarah chuan a beidawnthlak hlein kan hria,” an ti bawk. Grape Growers Society hruaitute chuan tuna Wine an siam mek ang chi ni lo ‘Beer’ pawh an siam thei tih sawi mah se bul tanna tur an neih loh avangin tihngaihna a awm lo tih Zalen palai an hrilh bawk a. Winery-a grape tui sawr sa litre 1,70,000 pawh tun hnai khan a chhiat mai an hlauh avangin man tlawm têin an hralh a. Khawl an neih mek pawhin hna thawh tur a nei lo va, a chhiat mai an hlauh avangin a khat tawkin an tinung thin bawk. Society hruaitute chuan state danga thawnchhuak turin bultanna sum an neih loh bakah state dang atanga lo lut ah Mizoram sawrkarin chhiah (tax) a lak tlem avangin Company changtlung leh hlun zawkte chu an tan elpui an harsa niin an sawi. Hnahlan Grape Growers Society hian kuthnathawktute grape man nuai 80 a la bat sak bakah winery enkawlna senso engemaw zat nen ba a ngah hle a. Tunah hian Ministry of Agriculture-ah chhawmdawlna ‘MIS’ beisei mek an nei a, hei hi an hmuh theih chuan leiba an neih mek hi pek tlak a, bultan that leh theih an beisei. Hnahlan a grape chin uar anih lai leh an hralh that lai chuan kum tin nuai 150 vel an lalut thin a. Thingtlang lonei duh pawh an awm thin lo a, chhungkaw 4/5 vel lo nei duhte chu VC te hnenah in-report in an duhlai an vat mai thin a. Mahse tunah chuan chhungkaw 300 chuangte lo nei duh an awm a, a tam pawlah chhungkaw 150 vel tan bak ram theh/lo neih tur a awm si lo va, chhungkaw tam tak chu an buai hle. &&&&