Mizote hunpui Krismas leh Kumthar chu tluang taka hman zawh a ni a, kum dang aiin kumin hunpui hi a rualmuangin buaina thleng pawh a tlem zawk nia thudawn a ni. Aizawl SP Neihchungnunga chuan kumin Krismas leh kumthar vuakvetah buaina lian thleng a awmlo nia sawiin muanawm taka hman a ni tih amah kawmtu Press mite a hrilh a. Hetih lai hian kumhlui thlah zana halpuah leh halmawi hal eng emaw zat a awm erawh pawi a tih thu a sawi. Aizawl khawpui chhunga Police Station hrang hrangte pawhin kumdang aiin man an nei tlem zawk. Excise & Narcotics Department hotute pawhin hunpui lo thleng tur atan hian nasa takin an inbuatsaih nia sawiin zu man nei nual mahse zu rui buai erawh man tur an tam lo hle tih an sawi a, tluang taka hunpui hman zawh a ni chu lawmawm an tih thu an sawi bawk. Kum danga hunpui laia buai zual thin Civil Hospital,  Aizawl emegency department (Casualty) thawktute pawhin ni dang aiin hunpui laiah pantu an pun phah chuang lo niin an sawi a. Zu leh a kaihhnawih natna avanga pantu awm nual bawk mah se ni dang aiin an pung chuang lem lo tih an sawi a. Casualty pan an tam chhan hi hunpui laiin damlo inentirna (OPD) khar a nih vang pakhat nia an hriat thu an sawi bawk. Hunpui denchhena mi an sa hawk avang leh lirthei chetsualna a thlen tam hlauhthawn thilah Traffic Police lam pawh ngawrh takin an duty bawk a, Traffic thawktute pawhin lirtheia chetsualna lian a thleng lo niin an sawi. Central YMA President Vanlalruata chuan kumdang aiin khawlaia vakchhuak an tlem tih a sawi a. Krismas chu a nep ta deuh em ni tih a awl nia sawiin tun aia hlut thar leh nise a duh tih a sawi. Aizawl veng pakhata YMA hruaitu chuan mipui ten thlamuang taka Krismas leh Kumthar an hman theih nan ngawrh takin an duty nia sawiin, “Zu rui chu awm bawk mahse mi dangte harsatna siam zawnga khawsa an awm lem lo a. Tlema rawlthar han pawr deuh pawh tha taka kan zilh chuan an awih ve mai a, kum dang zawng aiin a ralmuang niin ka hria,” tiin Zalen palai a hrilh bawk. Kum 2017 Krismas leh kumthar vuakvetah hian lirthei chetsualna liantham thleng a awm hriat a ni lo a. Tualthihna thleng pawh a awm hriat a ni lo bawk. Chutih rual chuan Kohhran hrang hrangte lengkhawm erawh a tha tawk lo hle a, Kumtharah lengkhawm an tui zawk nia hriat a ni. Hetih lai hian kum danga hunpui puala kawn chei chu kum dang angin uar a ni lo a, mipui nunau leng chhuak pawh kum dang ai chuan an tlem zawk  nia thudawn a ni.