’Hmasawnna chak takin Mizoram pawh a tuam chho zel a, tunhma a inbiakpawhna chu kawlphekhawnvar leh darthlalang hmanga signal inpek te a ni a. Zualko leh thil pawimawh khual khua a inhrilh nan tlangval tlawmngaite an kal thin a, chhungkhat laina leh thil pawimawh inhrilh nan ‘lehkhathawn’ hman a ni thin bawk. Mahse heng a chunga tarlante hian tunah chuan mual min liamsan mek a, mahni thuthmun atangin khawvel hmundang thlanga chanchinthar awmte kan hre zung zung a, zualko nan leh lehkhathawn hmanga hmangaih biahthu inhrilhnan pawh ‘mobile phone’ chu kan leklam ber a ni ta. Economics & Statistics Department in kum hnih dana a tihchhuah thin Mizoram Statistical Handbook 2016 ah chuan March 31, 2016 thleng khan Mizoramah mobile phone subscriber 10,28,076 an awm a, kum hnih a vei leh tawh avangin a punna hi 50,000 chuang nia rin a ni. Mizorama mobile phone service provider zingah Airtel chu subscriber ngah ber an ni a, BSNL chuan an dawt. Mizoram ah mobile a inbiak dawnin vawi tam hmeh a ngai fo thin a. A bikin BSNL chu Airtel atanga biak a har hle a, hemi chungchangah hian BSNL thawktute chuan ‘Airtel lamin block an neih vangin’ BSNL leh Airtel chu inbiak a har bik niin Zalen an hrilh a. Landline chiang lo leh ri tuk tuk awm thin chu a hruiah tui lut a awm thin vang niin an sawi bawk. BSNL Landline bikah hian broadband hmangtute chu an phone ah ri/chiang lo a awem tam bik nia thudawn a ni. Inbiakpawh harsat chungchangah hian Airtel thawktu pakhat chuan customer an tam lutuk vanga harsatna thleng niin a sawi a. “Phai lamah chuan tower pakhatin customer 50,000 chawm thei tur anga chhut a ni a, hei hi Mizoramah pawh kalpui anih avangin tlangram tan chuan a buaithlak chin a awm a ni,” a ti. Airtel thawktute chuan tun hnaia Aircel an tlakchhiat avangin Aircel hmangtu mi thahnem tak chu Airtel customer-ah an inlet nia sawiin hei hian service tha pekchhuah kawngah harsatna a siam tih an sawi a, Aircel subscriber 60-70% chu Airtel-ah an inlet niin a sawi bawk. Hetih lai hian mobile subscriber pakhat chuan mobile phone service provider ten an subscriber te an ngaihsak tawk thin lo chu tha lo a tih thu a sawi a. “Mamawh hunah pawh kan hmang tha hleithei lo hi chu a thinrim thlak a, mahni bulhnai maia awmte pawh biak tum pawh ni ila kan be thei lo a; chuvangin, tun aia tha zawka an service hi kalpui thei se ka duh hle a ni,” tiin Zalen palai a hrilh bawk. Mizote hi thil intihmuh hnam kan ni a, mi rethei zawka ngaih te pawhin mobile phone changkang ber ber an hum a. Mobile phone zawrhna dawr nghaktute chuan phone man tlawm ai chuan a changkang leh man to deuh chu hralh a kal zawk hle niin an sawi a, a tlangpuiin Oppo, Vivo, Samsung leh Redmi chu an hralh kal nia sawiin Rs.10,000 bawr vel leh a chung lam chu an hralh tam ber anih thu Zalen palai an hrilh bawk.