Online troll an tih mai, internet platform hrang hranga inkahna leh intihmualphona kaihhnawih thil reng reng hi tun tum chu i han belchiang chhin teh ang. Social media kan tih - WhatsApp, Facebook, Instagram, Twitter leh a dang dangah hian troll ang chi hi a tam hle tih chu tlang hriat a ni a, Mizote pawhin ni tin kan nunpui a, kan hlimpui ber pawl a ni tawh a tihtheih awm e. Hemi kaihhnawih avanga rilru na intihlum hialte pawh sawi a awm ta! Mizoram Police-a crime branch lam hotute chuan intihmual phona leh inkahna kaihhnawihah hian report hreh an awm thin nge report a la tam lo tiin an sawi a. Hetih rual hian Facebook, Instagram leh a dangtea inkahna group hrang hranga mawhphurtute chu kohkhawm tawh tiin zirtirnate pek an nih thu an sawi a. Fimkhur tura an hriattir thu an hrilh niin an sawi bawk. Police hotute chuan Mizo ten social media lama troll kan tih nasat viau tawh laiin kan la zo lo deuh tiin an sawi a. “IT Act-ah a hremna tur a awm thin a; nimahsela, Right to Freedom of Speech a kalh nia ngaih a nih avangin IT Act, Section 66A chu paih a ni tawh,” tiin Crime branch hotute chuan an sawi a ni. Hetih lai hian kawng hrang hrangin a case azirin hrem theih an ni tho tih an sawi a ni. Psychiatrist Dr. C.Lalhrekima chuan midang ngei tur leh anmahni tina thei tur zawnga social media-a thil ziah (troll) chingho hian a tuartu rilru leh thinlung a tina thei hle tih sawiin mualphothlak leh zahthlak tih avanga dam ve reng zahna te, nun hlim loh avanga nun thlakhleh tawh lohna te avangin mahni intihhlum hial pawh an duh a, an tum a, an hlawhtling thei bawk niin a sawi a ni. Troll kaihhnawihah hian chi hrang hranga inhrem theih a ni a. Mipat hmeichhiatna (sexual harassment) kaihhnawih a nih chuan Section 354A IPC hmangin rem theih a ni a. An hriat loha hmeichhia enthlak emaw thla lak ruk sak (voyeurism) te, zahmawh kaihhnawih (sexual explicit content) te, online hmanga in zirchianna leh internet-a mi thiltih en ruk (online stalking), invauna (criminal intimidation) leh intihmualphona thlengin Indian Penal Code-ah inhrem theihna a awm vek a ni. Sorkar laipui Home Ministry hnuaia National Crime Records Bureau (NCRB) chuan case hrang hrang an record-na database-ah trolling kaihhnawih case hi record a ni ve tawh dawn a ni. “Tu pawhin mi mal inhuatna kan nei thei a, ngei zawng riau mihring emaw, pawl/group emaw pawh kan nei thei vek, a mualpho zawnga intih hi a tha lo hlein ka hria,: tiin Dr. Hrekima chuan ZALEN a hrilh a. “Mihringpuite hi kan ngainat zawng an nih vek kher loh pawhin mi tana ngeiawm luih kher hi a ho tlat! A lo tuartu kha rilru na takin lo inthat sela a pawi dawn em mai, nunna leh nunhona inzahtawnsak a tul ka ti hle a ni,” tiin a sawi bawk.