Tunhma chuan zualko leh zinmite hmangin chanchin kan inhrilh thin a, changkannna kal zelah lehkhathawn hmangin chanchin kan inhrilh a. Tunah erawh chuan eng emaw pawimawh bik thilah tih loh chuan lehkha hmanga indawr a awm ta meuh lo a, inbiakpawhna leh chanchin inhrilhna atana kan hman ber chu Mobile phone a ni ta. He changkanna hian chhungkaw tin a luhchilh a, chhungkaw member zingah mi pakhat tal chuan mobile phone kan nei deuh vekin a rinawm a, chhungkaw kima nei pawh thahnem tak an awm bawk.   Hetih lai hian inbiakpawhna erawh chuan duhthu a sam tawk lo hle mai a, kan mi biak duhte pawh tum eng emaw zat biakpawh tum hnua tlang chauh te a awm a, a chang chuan mahni bulhnaia mi ngei te pawh han biak tum ila, ‘not reachable’ tih te, ‘switch off’ te a inti thin a. Tum tam tak try hnua tlang chauh leh thenkhat ah phei chuan beidawn hial changte pawh a awm a ni.   Mizorama mobile service pe chhuak zinga subscriber ngah ber, Airtel thawktute chuan an tower neih saah harsatna an tawh avangin tower an phun belh mek nia sawiin hei vang hian harsatna an tawk tih an sawi.   Mobile neitute chu an phone 4G-a dah aiin 3G emaw, 2G emawa dahin biak an awlsam zawk tih sawiin harsatna awm chu chinfel thuai an beisei tih Zalen an hrilh.   BSNL thawktute chuan inbiakpawh kawngah harsatna an neih an hre lem lo niin Zalen an hrilh a. Internet pek chhuah kawngah pawh an line te Power Grid Corporation of India (PGCIL)-a an thlun atangin harsatna an tawk tlem a, Lunglei leh Serchhipah pawh broadband tha takin an pe thei tawh niin an sawi bawk.   Statistical Abstract of Mizoram 2017 tarlan danin Mizoramah mobile connection pechhuak company 6 an awm mek a, heng zingah hian Airtel hmangtu tam berin 413,326 an awm a ni.   Mobile company dang te hi BSNL, Aircel, Idea, Vodafone leh Jio te niin Mizorama mobile connection nei zat chu 1,1130,253 nia tarlan a ni.