National Skill Development Council-International (NSDC-I) hnuaiah Mizo thalai, Japan rama nurse hnathawh tum mi 14-te chu January 25, 2023 khan khatih laia Labour, Employment, Skill Development & Entrepreneurship (LESDE) Minister Lalchhandama Ralte chuan Delhi-a Japanese tawng thla kua chhung zir turin a vai liam a ni.

Heng mi 14-te hian tawng an zir hnuah exam neiin an zinga mi paruk - Cindy Malsawmtluangi, Champhai; Josephine Lalchungnungi, Sairang; Lalliankimi Ngente, Lunglei; Ruthi Lalawmpuii, Bungtlang; Vanlalmalsawmi Khiangte, Lunglei leh Vanlalruati, Chanmari, Aizawl te chu thawk chhunzawm zel turin an tling a. January 26, 2024 khan Delhi panin, chuta tang chuan Tokyo-ah thlawk lutin bullet train-in an thawhna hmun tur, Ishikawa an pan a. Heng mite bakah hian hna hmu tawh, Visa la buaipui mek kal tur eng emaw zat an la awm bawk.

LESDE thawkte chuan Japan rama nurse hnathawk tur an tirh chhan chu an hna an thawh nasat vang te, dan leh thupek kenkawh kawnga an chak vang leh ram changkang an nih vang tih an sawi a. “Japan ramah hian hna an thawk nasa em em a, an work culture hi khawvela tha ber zinga mi a nih avangin thalaite hian paw chhuak se kan duh a. Chubakah Japan ramah hian dan an kengkawh thain an him a, ram changkang a nih bawk avang hian an thatna lai hi paw chhuak thei ila kan duh vangin Japan-ah hian hna thawk se kan duh a ni,” an ti.

Japan rama hnathawh chu ram pahnih inremna anga kalpui a ni tih sawiin Technical Intern Training Programme hnuaiah Japan chuan an rama India thalaite hnathawh a phalsak a. Japan thiamnate pawchhuaka hnathawktu indaih lohna phuhru tura India thalaite kal a phal tih sawiin Japan-ah hian care worker mamawhna a sang hle niin LESDE thawktute chuan an sawi bawk.

Tuna Japan rama nurse hna thawk tur kalte pawh National Skill Development Council-in Noida-ah thla kaw chhung training an pe a, hemi hnu hian exam nei lehin an tlin chauhin an kal thei niin an sawi.

Tuna nurse kalte hi kum upa lam enkawlna hmuna thawk tur an ni.

Japan rama hnathawh chu hlawh a that vangin a hlawk tih sawiin LESDE thawkte chuan an sawi a, “Tuna nurse kan thawnte hian thla khatah Rs. 1,20,000 vel an hlawh dawn a, hei bakah hian over time-a an thawh chuan hei aia tam daih hi an hlawh thei dawn a. An ei leh in leh mamawh hrang hrang leina te paih hnuah kum khatah nuai 5 aia tlem lo saving an la nei thei turah kan ngai a. Kum nga an thawh chuan nuai 25 tal chu an hum haw thei turah kan ngai a ni,” an ti bawk.