Nikuma Reliance Jio rawn chhuak in a nghawng tih theih turin Mobile Network company dangte chuan offer tha tak tak an rawn siam thar ve tan ta a. Heng company dangte hian a free vek chuan pechhuak chiah lo mahse an sim card hmangtu te tana hamthatna tur hrang hrang an rawn siam thar a ni. Kan sim card hman reng thin te thlakin a free-a 4G internet hman theihna tur Reliance Jio chu kan book sup sup mai a, hmang pawh an tam ta hle a ni. Reliance chuan mobile network company te zinga chungnun ber tumin tan a la reng a, hetih lai hian company dang te pawhin an customer hloh bik tum lovin hamthatna (offer) thar hrang hrang an lo siam chho zel a. Loh theih lohin man tlawm zawka 4G network hman theihna tur an rawn duang ta hlawm a, nitin nuna internet a pawimawh tawh em avangin keini mipuite tan chuan thu lawmawm tak a tih loh theih lovang. Company hrang hrang ten 4G offer an rawn duan dan hi i han thlir dawn teh ang. Vodafone hian Rs 50 hnuailamin 1GB 4G chu an hralh chhuak thei dawn a, Rs 1499 man thunin 35GB a lut a, hei hi 1GB ah Rs 43 ang vel a ni. Rs 999 man thunin 22GB a lut a, hetah ve thung hian 1GB man chu Rs 50 ang zel a ni. Hei hi 4G man sang zual pahnih an ni a, GB khat zel hisap erawh chuan a man a san poh leh a tlawm zawk a ni. A man a tlem telh telh hian GB khat man hi a pung zel a, Rs 147 hi GB khat man to na ber a ni a. Rs 147 hian 1GB a thun theih ni. Vodafone hian Rs 16 mana recharge in 'super hour' an tih, darkar khat chhung duhtawka internet hman theihna tur an siam tel bawk a ni. Idea ah ve thung chuan Rs 348 mana recharge in 1GB a free in an nei tel thei ang a, 4G handset thar hmangtu ten hemi man tho a an recharge chuan 3GB data an neih belh dawn a ni. Hei hi ni 28 chhung a dam ang a, he offer hian kum khat chhung a awh ang a, he offer dawng tur hian vawi 13 a recharge theih dawn a ni. Hei bakah hian post paid hmangtu te tan pawh hamthatna hrang hrang a awm bawk a ni. Airtel ah ve thung chuan Rs 345 man thunin 4GB data a lut ang a, hetiang hian kum khat chhungin vawi 13 a recharge theih dawn a ni. Rs 345 hi 1GB man ang vel niin 3GB hi free nia thudawn a ni a. Mizoram Airtel erawh chuan thuthar an la neih loh thu Zalen palai an hrilh a ni. Heng bakah hian company dang pawhin hma an la ve zel a ni. Reliance Jio rawn chhuah vang hian Aizawla top up zuar hrang hrangte chuan an top up hralh a tlem sawt thu an sawi a. Dawr pakhat nghak tu chuan an top up hralh a tlakhniam thu sawiin, "A tlahniam nasa em em a, ni khata hralh tur Rs 5000 man vel kan thun tir thin kha tunah chuan Rs. 3000 man vel chauh kan thuntir tawh, pawisa note thar thlak in a lo nghawng bawk nen company hrang hrang top up kan hralhna hi a tlahniam vek a ni," a ti. Dawrkai thenkhat chuan a tlakhniam tho laiin a tlakhniamna a nasa lutuk lo a ni, an ti a. Mission Venga top up zuar pakhat chuan an hralh tlem phah thu sawiin, "A tir lam kha chuan kan hralhna a tlahniam em em a, tunlai hian a ziaawm ve tan a ni," a ti. Mobile network company hrang hrangte hi an intlansiak mup mup reng a. Thenkhatin dan zawm famkim lova an hmuh te chu dan angin an khing a. Hnehtu nih tumin, chungnun ber tumin mahni company tana tha ber turin an thawk suau suau reng a. Hetih lai hian keini mipui te chuan pheichham man ang hiala in ngaiin lawm takin a thlawnin internet kan lo hmang ve mek zel bawk.