Citizenship (Ammendment) Bill 2016 duh lohna chu lantir chhunzawm zel a ni a. He bill hian a bik takin northeast lamah hian duh lotu leh dotu a ngah a, kan buai mup mup chu a nih ber hi. Zirlai pawl hrang hrangte leh pawl hrang hrangte'n kan ram tana tha lo a ni tiin an tlangau a, nasa takin hma an la mek a ni. Citizenship (Ammendment) Bill, 2016 hi sAWrkar laipuiin July, 2016-ah khan Lok Sabha ah a pharh a, Citizenship Act 1955 siamthatna tura ruahman a ni. He Bill-ah hian Afghanistan, Bangladesh leh Pakistan atanga India-a lo lut community paruk- Hindu, Sikh, Buddhist, Jain, Parsi, Kristian emawte chu kum ruk chhung India-ah an awm tawh chuan India khua leh tui nihna pek tur tih a tel a. Hei hi kan helh ber chu niin a lang a ni. Hemi chungchangah hian pawl hrang hrang chuan an ngaihdan te an sawi a. MZP President, L.Ramdinliana Renthlei chuan North East Student Organization nen tangkawpa sit-in demonstration Aizawl-a an neihnaah khan thu sawiin he bill hi sakhaw behchhana khua leh tui nih theihna tur a nih ber thu leh Mizoram tan a him loh lehzual thu a sawi a. Tlawmngai pawl te thahnemngaihna chauh a tawk loh thu leh MLA te chu House-a he Bill duh lohna resolution pass se an duh thu leh, chu chuan Bill dodalna kawngah awmzia a nei lehzual dawn thu a sawi a ni. Itanagar-ah chuan  All Arunachal Pradesh Students’ Union (AAPSU) chuan an thil phut hi tihhlawhtlin a nih hma chu sawrkar an nawr zel dawn thu an sawi a. Kohima-ah pawh Naga Students’ Federation (NSF) chuan central sawrkarin Lok Sabha-a he bill an pharh an duh lohzia lantirna an lo nei tawh bawk. PRISM party chuan Citizenship (Amendment) Bill, 2016 chu pass a nih loh nan an theih ang angin hma an lak zel dawn thu an sawi a. He bill chungchanga Law & Judicial Minister hoa meeting thurel, Chief Minister hoa meeting neih tur tih chu neih a la nih loh thu leh neih anih thuai theih nan thuneitute an ngen nawn leh tawh thu an sawi a ni. Central YMA President Vanlalruata chuan Zalen zawhna chhangin he bill pass a nih loh nan hian an theih anga hma an lo lak tawh thu leh hmalak zel an tum thu a sawi a. Nikuma Prime Minister a lo kal khan lehkha an pek thu leh he bill hi mipuite tan a that loh thu amah ngeiin tawngkaa a hrilh thu a sawi a, President kalchhuak ta Lalbiakzuala pawhin Delhi-ah lehkha a lo thehlut tawh niin a sawi bawk. A tul anga hmalak zel an tum niin Zalen a hrilh. Zoram Peoples’ Movement (ZPM) General Secretary K.Sapdanga chuan an party chu hma la tura an inrin reng thu a sawi a, Party bila tih ai chuan NGO ten hma la se nghawng a neih that ber an ring tih a sawi a. Chuvangin, NGO te an ngaihchan thu leh, an hmalakna apiang an thlawp tur thu sawiin party zawng zawng bakah kohhrante pawhin thlawp vek se a that thu a sawi. State sawrkar pawhin hma la se nasa taka nghawng a neih a rin thu Zalen a hrilh bawk.