Aizawl khawpuiah hun eng emaw chen kalta atang khan kawng kam hmun remchang laiah thingpui leh chhang zawrh a ni a. Heng chhang kang thinte hian an hlawkpuiin tun hnaiah phei chuan kawn leh hmun remchang laiah thingpui leh a hmeh zuar an tam ta hle.

Aizawl khawpui kawng kama zing thingpui dawr siam thin pakhat chuan zingkar thingpui siam chu eizawnna tha tak a ni tih ZALEN a hrilh a. “Tun hma deuh kha chuan zing kara chhang kanga zuar thin hi an la tlem avangin kan inhralh tha thei hle a; mahse, tun hnaiah inzuar neuh neuh hi an tam tak avangin kan sum hmuh hi a tlahniam ta deuh a, tuk khatah hian Rs. 10,000 hmuh loh chang te, a chang chuan pelh chang te pawh kan nei thin a. Hah deuh mah ila eizawnna tha tak niin ka hria,” a ti.

Zing chhang kang thin pakhat pawhin eizawnna tha tak nia a hriat thu ZALEN hrilhin, “Kan thawkrim a, a chang chuan zing dar 3:00-ah hian thingpui leh chhang tharlam kan nei hman a, min pantu hi an awm ve reng bawk a. A tlangpuiin kan inhralh tha ka ti a, a bikin Inrinni tuk hian bazar an tam thin avangin kan inhralh tha zual niin ka hria,” a ti a. Chhang a neih zingah paratha leh chhangban chu an hralh kal ber nia a hriat thu a sawi bawk.

Hmun hrang hranga zin chhuak thin driver pakhat chuan zin turin a changa hma taka chhuah a ngaih chang leh khawvar dawna haw changte an neih thin avangin hetianga kawng kama thingpui dawr a awm thin chu tha a tih thu a sawi.

Zing kara thingpui in thin pa pakhat chuan kawngsira thingpui dawr awm thin chu a chhawr tangkaiin tha a ti hle tih Zalen a hrilh bawk a. “Zing kar hma taka thingpui in mai tur a awm thin hi tha ka ti hle a. Mahse, kawng kam ngang a nih avang hian lirthei khu leh eng emaw bawlhhlawh leng vel hian a tibawlhhlawh thei niin a lang a. Chuvangin, tun aia thianghlim leh felfai deuh zawka kalpui dan hi awm se a tha hle in ka hria a ni,” a ti ve bawk.

Aizawl khawpui kawng kama thingpui dawr siamte hi a tlangpuiin zing dar 3:00 velah an awmna turah inrem felin zing dar 8:00 velah chuan an inseng tawh thin a ni.