Tam tak chuan khawpui a ti tawp kan ti ang a, a lehlamah chuan mi tam tak tan chuan awlsam a thlen kan ti thei ang. Khawkar kawnga kawng kama inzawrh ngat phei hi chu zin vei vak tan thil lawmawm tak a ni a, Mizoramah phei chuan kawng kamah nghah loh dawr te hial kan nei.

Aizawl khawpui chhungah ngei pawh Bazar lian tak tak kan nei chungin kawng kamah tam tak an inpho a, mi tam takin mamawh lam khawm nana an hmang nasa hle. Aizawl-ah hian hmun tam takah Inrinni bazar-ah phei chuan kawng kama inpho an tam a, mi tam takin eizawnna a ni, heng hmunah te hian thingtlang hmun hla tak tak atangin inzuar turin an kalkhawm thin.

Bazar kan neih hovah te mi tam takin thutna hmun an nei a, mi zawng zawng tan thutna hmun a awm lo a, thingtlang mite tan thutna han neih ngawt theih a ni lo a, chuvangin an tan kawng kama inpho hi an sum hmuhna hnar a ni ve tlat a, tam tak tan, a bik takin lirtheia kal te tan hnawksak ni mah se, an nitin hnathawh rah an seng theihna a ni a, bazar-a thu te aiin heng kawngkama thu te hian thil an titlawm thin bawk.

Tuikual bazar an tih mai, Inrinni zinga Horticulture leh Agriculture office bawr leh Assembly house kawmthlang leh a sir lama inzuar thin te hi a tam zawk chu thingtlang atanga rawn inzuar te an ni a, Zirtawp zanah an inzawrhna hmun tur hi an rawn pan a, Inrinni zanah an haw leh mai thin. Hemi hmuna inzuar pakhat chuan, "Hnawksak kan nihna chen hi chu a awm ngei ang, mahse, hei hi kan thlai thar te kan hralh ve na hmun a ni a, inzuar lo ila chuan kan tlachham chu a ni mai. Kharchhawng hnena kan pekin kan pekna a tlawm si a, chuvangin hetiang kan rawn tih ve tang tang hian kan hlawk ve deuh a ni," tiin ZALEN a hrilh.

Chanmari a inzuar pawhin an khawmi helai hmuna inzuar hi engemaw zat an awm tih a sawi a, motor in-hire tawmin he hmun hi an pan thin tih a sawi a, a hma a mi sawi ang bawk hian khawpuia rawn inzawrh chu an tan a hlawk zawk a, motor hman man chawi mah se, kharchhawng a pek ai chuan an la hlep that zawk thu a sawi ve bawk. Kawnga lirthei kal tan an hnawksak tih a pha lem lo. Chanmari Inrinni bazar-ah hi chuan Zarkawt tlang lam pan chhohna kawng hi khar a ni hial thin a ni.

Khaw kar kawng sira inzawrh pawh hi thingtlang khaw tam tak eizawnna a ni a, khaw tam tak chu kawngpuiin paltlang lo mah se, an khaw hnaih kawngpui kamah te bazar siamin an inpho thin bawk a, heng hi khualzin mi te tan a tangkai hle a, heng thingtlang kawng kama chawhmeh leh thil zuar te hi khawpui ai chuan an tihtlawm thin thu ZALEN an hrilh a, chutihrualin phai lam chawhmeh ang chi te hi chu khawpui aiin an zuar to thin thu an sawi ve thung.