Hripui vangin kum 2 zet nunphung a khaihlak chungin Mizoramah chuan naupang kum 6 hnuailam te hnenah chaw tha 'nutrition' chu inkhuahkhirhna karah pawh khaihlak awm lova sem a ni.

Mizoram State Child Protection Society hotute sawi danin hripui len tantirha, khauh taka inkhuahkhirhna leh lockdown kalpui anih lai pawh khan naupang ten chaw tha an dawn theihna atan theihtawp an chhuah a, hei vang hian naupang kum 6 hnuailam anganwadi a kal thin te chuan chaw tha hi an dawng thei zel niin an sawi. 

Mizoram State Child Protection Society Secretary leh Women and Child Development department Joint Director ni bawk Zoramthangi Chhangte chuan, "Na taka inkhuahkhirhna kalpui anih lai pawh khan nutrition phurtu te chu ngaihhnathiam an ni a, nutrition phurh kawngah harsatna kan neih loh avangin leh khawi hmunah pawh motor a tlan theih vek avangin khaihlak awm lovin kan sem thei a ni," a ti.

Khawtlangin nutrition sem kawngah nasa takin an pui tih sawiin Zoramthangi Chhangte chuan, "Inkhuahkhirh vanglai pawhin khua leh veng hrang hranga task force ten kan sem theih nan nasa takin min pui a. Inrinni ah te nutrition semna hun min siamsak a. Hei mai bakah anganwadi thawktu ten naupang te chu an inah kal chilhin an sem bawk a ni," a ti.

Anganwadi hrang hrangah hian nutrition ah chana, dal, buhfai, biscuit, suzi, wai wai, rice cake leh chaw tha chi hrang hrang te sem a ni a. Naupang te hi a,b,c bakah 1,2,3 te zirtir an ni a. Mizo thawnthu chi hrang hrang te hrilh an nih bakah hla te zirtir an ni bawk a. Nursery leh KG I a zirlai ang hi chu a tlangpuiin zirtir an ni.

Mizoram thingtlang khaw thenkhatah chuan naupang nu leh pa ten an thlaithar leh chaw tha te an thawhkhawm a, naupang te chhun chaw atan an pe a. Hmun thenkhatah chuan anganwadi pual hian huan te siamin thlai rah leh chaw tha te an ching thin bawk.