Mizote chanchina an khawsak tawhna hmun hlui hriat hlat theih ber zinga mi leh Mizo chanchina hmun pawimawh tak luahtu Khampat Bung hmalam hun a eng dawn tan ta a, a bul hnaia khawsa Kawl hoten harsatna an siam thin chu Myanmar sawrkar in humhalh lam kawng a hawi tak avangin a hung hna pawh hun reiloteah thawh tum a ni.   Khampat Bungpui awmna hi Khampat khua ah a niin Sagain Regional State, Tamu District chhunga awm a ni a, Khampat khaw bulah hian Zohmun, Kanan leh Mizo hnathlak chenna khua eng emaw zat a awm a. Mizo khawpui tia hriat thin Tahan (Kalaymyo) khua atangin darkar 1:30 vel kal a ni bawk. Khampat khuaah hian in 3500 chuang a awm a, Mizo hi in 500 chuang an awm nia chhut a niin hnam dang chengte hi Kawl, Naga leh hnam dangte an ni. Mizotawng kan tih mai ‘Lusei tawng’ hi a tlanglawn hle a, hnamdang leh hnam dang an inhauh tak tak chuan Lusei tawng an hmang deuh zel niin an sawi.   Khampat Bungpui hi khua atanga hnai tê-ah a awm a, Kawlhoten an biakin ‘Pagoda’ awmna bulhnaia awm a nih avangin sawrkar lamah an hek ve reng a. Mi thahnemngaiten a humhalh hna thawkin han hung bawk mah se vawi tam tak tihchhiat a ni tawh a, a chang phei chuan kangmei a tuar a. Chumai bakah Bung sira lui luang chuan a kungpui hi a lak mai hlauhthawnawm khawpin a tiderthawng bawk.   Khampat Bungpui Humhalhtu Committee President BH Khuma chuan tun hnai khan Bungpui hi Chin Affairs Minister chuan tlawhin hmalakna hmasa atan pawisa cheng nuai 20 (Kyat 20) a pe tih Zalen a hrilh a. Sagain Chief Minister Dr. Myint Naing pawhin sawrkarin humhalh a tum thu leh a bula khawsa Kawlhote chu buaina siam lo tur leh an vanneihpui zawk tur thu a hrilh tih a sawi a. Tun dinhmunah chuan a bula khawsa te lak atangin harsatna an tawk tawh lo niin a sawi.   Khampat Bungpui Humhalhtu Committee President chuan Bungpui dinna tiderthawngtu lui chu July 15, 2015 khan a insawn nia sawiin phaizawl ram acre 8 vel chu an leisak tawh niin tun hnaia helai hmun tlawhtu chanchinbumi thenkhatte a hrilh a. Khampat Bungpui chu thirlen hmanga hung vek turin Municipal ah dil an tum tih a sawi bawk. Zawhna chhangin Khampat Bungpui Humhalhtu Committee President chuan Bungpui humhalhna leh a senso atan hian Rs. nuai 100 vel a ngai dawn nia an hriat thu sawiin hemi atan hian Myanmar, India, USA leh hmun dangah te vehbur khawn an tum tih a sawi bawk.