Mizoram, a bikin Aizawla khualzin lo kal te'n harsatna an tawh tam berte zinga mi chu \awng a ni a. Hei hi sutkian anih theihnan Govt. Johnson College chuan hma a lo la tawh thin a, hma lak zel an tum niin Zalen an hrilh bawk. Engtin nge hma an lo lak thin tih hi Zalen chuan zawtfiahin, phutlet nei lova a thlawn liau liaua saptawng an lo zirtir dan hi i han belchiang teh ang.
Govt. Johnson College-a English Department zirtirtu Dr. Lalrimawii Zadeng (Associate Professor) chuan an college hmalakna lo chhuah dan chu sawiin kum 2006 chho velah khan tourist te'n taxi driver te leh midang dang an biak hleihtheih loh thu a hnenah an thlen niin a sawi a.
"Hei hian ka rilru a luah hneh em em a, tihdan a awm ka ring a, principal hnenah room awl ka dil chawt a, ani'n rem a lo ti hlauh mai a, chuta tang chuan saptawng zirtir hna chu neih tan a ni," tiin he saptawng zirtirna bultumtu Dr. Lalrinmawii chuan Zalen a hrilh a.
Khualzin veivak phur tamtu taxi driver ho chu target ber an ni tih sawiin Dr. Rimawii chuan tumah an sawm chhuak thei lo niin a sawi a. Nitina eikhawp hlawhchhuak thin an nih thu leh hun an neih theih loh thuin an chhang thin niin a sawi.
Nimahsela hemi hnu hian Traffic Police lam biaiin kum 2009, 2010 leh 2011 chhoah an SP phalna in thla 3 course spoken English zirtirna pek chhoh an ni ta niin Dr. Rimawii chuan a sawi a ni.
Mizoram tlawhtu tourist te tana kan ram a nawm lehzual nan chuan heng anmahni phurkualtu leh khawlaia mipuite rawngbawltu traffic police te bakah midang pawhin saptawng an thiam a ngai a, hemi pawimawh zia hriaiin Dr. Rinmawii chuan sorkar kumtharah pawh a theih anga hmalak chhoh leh an tum niin a sawi.
Traffic police te hi batch thum an zirtir hman a. Anni bakah hian 3rd Battalion MAP te chu Mualpuiah saptawng zirtir an ni bawk a. Heng hmalakna zawng zawngah hi a thlawnin Dr. Rimawii hian college Principal phalna leh tuipuina in a kalpui thin a, doctorate degree tia a buai tak avangin tun hnaiah chuan a ti ta lo a ni. College semester system-a kalpui a nih tak hnuah hunawl a van thu leh UGC Scheme hnuaiah zirlaite zir tur hrang hrang a rawn awm tak avangin college hian pawnlam mite tan hun a nei tlem ta deuh niin Dr. Rimawii chuan Zalen a hrilh a, heti chung hian a tul anga hmalak chhoh leh an tum a ni.
February ni 10,2018 khan CYMA chuan Chapchar Kut inbuatsaihna kal mekah pawl hrang hrang kokhawmin hetah hian Johnson College thiltih chu Mizote tana a hlut thu CYMA hruaitute chuan an sawi a. College dang pawhin kalpui ve thei se an duh thu an sawi bawk.
Traffic Police an hnena zir tawh te zingah hian tawng an zir vang tih chu a a sawi theih chuang loh chungin departmental exam-a kaisang te pawh an awm tih sawiin Dr. Rimawii chuan tawng an thiam ve deuh tak avanga an tangkaina tur danga post te pawh an awm niin a sawi bawk.
"Mizote hi language lamah hian kan rilru a dawih a, hnamdang (vai) in an ngam angin ngam ila chu kan thiam daih zawk," tih sawiin saptawng zirna thahnemngai taka kalpuitu Dr. Rimawii chuan, "Tawng thiam tur zawnga infuih aiin in nuihzat lamah kan tuan a, kan in dang ping a ni, " a ti a. An hnathawh chu college in Mizo khawtlang tana a contribute ve a nih thu a sawi bawk.