Kan hma lawka Kristiante hunpui, Krismas leh Kumthar lo thleng tur atan mi tinte nasa takin kan inbuatsaih chho mup mup reng a. Tisa leh thlarau lama inbuatsaihna chuan a vawrtawp thleng chhovin Aizawl bazar pawh a lun ta hle. Aizawl bazar enkawltute chuan kum dang aiin bazar chu a lun hma deuh nia an hriat thu Zalen an hrilh a, nikum lama pawisa tih thih vang nge ni bazar an thawl a, kuminah erawh chuan kar thar hi a vanglai tur ni mah se a hma deuh atang tawhin thawmhnaw lei an tam tawh hle niin an sawi. Traffic Police te pawhin December thla tir atang khan an buai zual niin an sawi a. “Thingtlang lam atanga lirthei bazar tur lut an tam avangin thla dang zawng aiin kan buai a, lirthei intlanchhawk pawhin awmzia a nei meuh lo a ni,” an ti. Hunpui lo thleng tur hi mipuiten thlamuang taka an hman theih nan police-te pawhin theihtawp an chhuah a, bazar chhehvelah duty-na hmun thar an siam bakah nasa lehzuala tanlak an tum a ni. Tlawmngai pawl hrang hrangte pawhin zalen taka mi tinten hun an hman theih nan theihtawpin tan an la mek a, veng pakhata YMA hruaitu chuan December 15, 2017 (Zirtawpni) zan atang khan an duty tan niin a sawi. YMA bakah VDP, JAC leh a dangte pawhin hmalak chhoh an tum bawk. Hetih lai hian Kohhran hrang hrangte pawhin hunpui lo thleng tura kohhran mipuite tisa ruai thehna tur ran pawh an ngaihtuah fel thawkhat a, ruai atan hian bawng, vawk leh ar chu a langsar zualte an ni. Kum danga ruaitheh nana hmanlar thin ‘disposable plate’ chu mihring hriselna atan a that loh avangin AMC chuan hmang lo tura kohhranhote a ngenna ngai pawimawhin kohhran tam tak chuan hman loh an rel a, hei vang hian a zuarte pawhin kum danga an hralh ang chu an phak lo hle niin an sawi. Kohhran thenkhat chuan tun kar chho hian ruaithehna a hman tur hnah leh meichher lak an rilruk a, hmun hrang hrangah Krismas hla a ri ta chuah chuah mai.