Kuhva hi eng hunlai atangin nge Mizote hian kan chin ve tan hriat a ni chiah lo a. Mizoram khawthlang lam leh hmar lamah te a tha duh hle a, kum tin kuthnathawktuten sum lakluhna hnar berah an nei thin a ni.

Mizoram kuhvate hi hnam dang sumdawngten an khar thin avangin kuhva chingtute chuan a phun leh thlawh fai bak hna harsa lutuk an thawk lem lo a, hnam dang kharchhawngte hian a rah lawh leh a hralhnate an buaipui vek avangin kuhva chingte pawhin manhla an ti thei hle a ni.

Kum eng emaw chen harsatna awm lova hralh a nih hnuah thenawm ram, Myanmar atanga kuhva rah ro a lo luh atangin kan state thenawm, Assam chuan an state-a luh phal lovin a lut chhunte pawh an man thin a, hei vang hian hun eng emaw chen chu kuthnathawkten harsatna an tawk a ni.

Mahse, tun hnai hun eng emaw atang khan harsatna awm lovin kuhva hi hralh a ni leh ta a. Kuthnathawktute hian dan pangngaiin hralh leh thei tawh mah se kum dang ai chuan sum an lalut tlem thung.

Hachhek tlangdunga kuhva chingtute chuan an kuhva pangngai chu an hralh zo tawh niin an sawi a; mahse, kum danga an lawh hun runpui, December/January velah a hralh theih loh avangin a man a tlawm a, kum danga nuai 10 chuang lei thinte pawhin kuminah chuan nuai 4/5 chauhte an lei niin Zalen an hrilh.

Kuhva thar tam khua, Bilkhawthlir chuan an kuhvate hi an la hralh mek a, kumtirah hnam dang sumdawngten an khar fel vek avangin an ni hi chuan a rate-ah harsatna an tawk lem lo niin ZALEN an hrilh.

Hetih lai hian Myanmar atangin kuhva ro chu a rukin a lut reng tho a. Police-ten gate-te siamin check thin bawk mah se kuhva tawlhtute hi mi hausa tak tak an nih avangin kawngte sial chawpin police an hel a, kuhva hi an la tawlh lut reng thung. 

Myanmar kuhva rah lak luh kawngah hian a neitu emaw, a phurtu lirthei, a lachhawng leh tu, motor-a thiar kaitu mutia leh a rah tla chhar nen lam an hlawk vek nia sawi a ni.

Land Resources, Soil & Water Conservation department chhinchhiah danin Mizoramin kum khatah kuhva 1,87,703.29 qtls vel a thar chhuak thin.