Hmanlai atanga Mizo nun zemawi chu 'Aia upate zah leh tanpui' a ni a. Feh kawngah pawh an ritphurh te chhawkin Zonun zemawi an lantir thin. He zonun zemawi hi vawiin thlengin chhawmnun a la ni chho zel a, chung zinga mi Nathan R. Lalrindika, Venghlui chuan kum 70 chin chung lamte chu a thlawnin an lu a mehsak thin.

Nathan-a hian March, 2021, lockdown lai atangin YouTube atangin lu meh a zir tan a. Pachhunga University College-ah 5th Semester, Economics zirlai a ni a. Nitin class kal a ngaih thin avangin Inrinni leh pisa chawlh niah chauh dawr hi a hawng thin a ni. 

ZALEN-in a biaknaah lu meh chu eizawnna tlak nia a hriat thu a sawi a, “Dawr ka hawn ni hi chuan mi 10 atanga 25 inkar vel ka met ber a, a ti tha tan phei chuan hna tha tak niin ka hria,” a ti a. “Ni tin ka hawn hman lai kha chuan lu met tur hi an tam khawp mai a, zirna vangin nitin ka hawng hman ta lova, Inrinni chiah ka regular a, mahse rawn pan tawk chu an awm ve reng mai,” a ti bawk.

Kum upa lam a thlawna lu a meh sak chhan zawhna chhangin Nathana chuan, "Ka rilru ah kum upa te hi an tla na a, tar hna thawk, rit chawi te hi hmuh hrehawm ka ti a, ka theih ang angin ka tanpui ve thin. Lu meh ka thiam hnu hian kum upa lam chu ngaihsaktu an nei nia an inhriat phahna te a nih ve a ka hriat avang hian a thlawnin ka meh sak ta a ni,” a ti a. Kum upa lam lu an meh sak laia an titi sawi thin te chu ngaihnawm a tih thu a sawi.

Nathana chuan aia upa zahthiam leh chawimawi thiamte hi thalai te tih mak mawh nia a hriat thu a sawi a. Mahni kutkawih ngeia thawhchhuah chu a hlu hle nia sawi bawkin, "Mahni kea din tum nan hian tlai lua a awm lo a, kan mamawh leh duhzawng leina tur mahni ngeia thawhchhuah te hian mi a ti hlim in inrintawkna min siam bawk a. Mahni zirna senso ngei mai han thawhchhuah te hian hlimna min pe bawk a ni,"a ti bawk.