Fimkhurna hapta ‘Road Safety Week’ chu hman mek a ni a, mipuite hnenah fimkhur a tulzia inhrilhhriat mek a niin lirthei chetsualna tam ber hi ruih vang a ni. Traffic Police in lirthei chetsualna thleng hrang hrang atanga an chetsual chhan an chhinchhiah danin lirthei chetsualna thlentu tam ber chu zu leh drug ruih vang a ni tih an sawi a. Heng bakah hian tlan chak lutuk, driver mutthluk vang te chu a chhan lian dang a ni a. Motor khawl harsatna avang leh kawng chhia vanga chetsualna thleng pawh a awm bawk. Mizoram Police record atanga a lan danin kum 10 kalta (2008 atanga 2017) chhung khan lirthei chetsualna tum 988 a thleng a, thi 756 awmin hliam 1743 an awm bawk. Kum 10 kalta chhung vek khan Aizawl Traffic Police-te chuan lirthei dan bawhchhia 98246 an man a, heng zingah hian two wheeler chu dan bawhchhe tam ber an ni a, 49808 man an ni. Traffic Police ten dan bawhchhia an man atanga an pawisa chawitir tlingkhawm hi Rs. 29,369,062 a tling a ni. 29th Road Safety Week 2018 hi Thawhtanni khan Transport Minister John Rotluangliana chuan a hawng a, kumin he week thupui chu ‘Drive Safely, Save lives’ (Khalh fimkhur la, nun chhanhim rawh) tih a ni. Transport department chuan kumin week denchhen hian mipuite himna atan flag an zawrhtir leh a, hei hian mi thenkhat sawisel a hlawh deuh. Zalen zawhna chhangin Transport department thawktute chuan flag an zawrh chhan chu mipuiten fimkhurna hapta an hmang a ni tih hrethar leh se an duh vang a ni tih an sawi a. Mi tam tak TV leh chanchinbu pawh en lem lo an awm nia sawiin chung miten lirtheia flag tar an hmuh atangin fimkhurna hapta hman a ni tih an hre thar a, chu chuan fimkhur pawimawhzia an hriattir thin avangin hetiang hian hma an la tih an sawi a. Tuna an hmalakna aia tha an la hriat hrih loh thu an sawi bawk. Zawhna chhangin Transport department thawktute chuan road safety week flag chu mi thahnemngai ten inhlawh nan an siam thin tih sawiin an zawrhna atanga 10% chu department-in a laksak ve niin an sawi a. An sum laksak chu kum 2016 atanga tan niin he sum hi a hranpaa road safety fund a awm loh avangin road safety hman nan tangkai takin an hmang niin Zalen an hrilh bawk.