Zan hmasa lama duty rei phei chuan a tuka din nilen leh thak hahthlak zia i ngaihtuah tawh em? Ke a kham lo, a khawng zawk. Thin a ti chhe hlur duha, Traffic police te hmel lanna an ni tih nghilh zauh a awm pawhin a awm ve tho asin! Duty reiin hlawh pung hek suh. A hnuaia tlar tlemte inziak hi Zalen in traffic arsi bel kai lo tlemte a kawmna a ni a, an rankin media zawhna a chhang pha em? tih ai chuan an hahzia leh harsatna an tawhte mipuiin an hriatpui tihah an lawm tawk em em zawk a ni. ‘Nilenga din leh phar hi chu ngaiah ka neih tawh, eizawnna ka hmuh chhun a ni a. Two wheeler khalh te’n dan an ngaizam berin ka hria ,’ tiin traffic police la senior lem lo pakhat chuan Zalen palai a hrilh a. Mizo tlangval a bikin 2 wheeler khalh zinga an man te zingah mahni pa, emaw chhungte hma theh ching an la awm thin chu zahthlak a tih thu sawiin, ‘An pa te nihna chu an nihna angin an ngai tlat hi atna chi khat niin ka hria, mipa chuan a thil tih sual chu a tuar ngam tur a ni a. Office lam kan panpui lai atangin kan man phak an nih loh thu min sawi khum bawng bawng a. An sawi ang hian an chhungte an rawn che a, kan pu te tan a luhai thlak duh khawp mai,’ tiin a sawi a. Chhuah loh theih loh chang a awm a, chu a chhapah runluih an tawk fo. An man te ngeiin an bul hnai an thlenin an herh (race) vu vak vaka, insum zawh loh ni a la neih a rin thu a sawi lang bawk. A sawi zel danin patling an man te pawhin dan bawhchhetu zawk ni mahse an hnial let hrep thin a. ‘Hmaizahna vang liau liaua chhuah loh theih loh an awm thin a, mahse hetiang ti ching hi kan ngaisang lem lo,’ tiin hrehawm a tihchang a awm nual thu a sawi. Hmeichhe scooty khalh te’n man an tawh changa khawngaihna dil ngawng ngawng an ching niin a sawi bawk a. ‘ Dan hriat kan tla chham ta viau mai. License pek chhuah hi kan awlsam deuh em aw? ka ti fo thin. Ka man pa pakhat pawh Dropping Zone leh Parking Zone a danglam loh thuin a tang tlata, a hmel nen a inhmeh lo ka ti thlawt,’ a ti. Traffic police a senior pawl ni tawh chuan midang ngaihchan lohna lirthei khalhtute zingah an awm nawk nia sawiin intai leh insut thlentu niah a ngai a. Two wheeler khalh an ni bik a, wrong side a tlan an man zingah ‘ka hmanhmawh deuh a’ tih chu a tawnhriatah a ri zing ber a ni. Thil tithei te’n an duhsak zawk an thun thin thuah, ‘A pawi ka ti a, miin an hre vek a, kan hna an hmuh hniam phah thei a. Ruihtheih thil lo ti mualphopui te an awm nawk tawh a, ‘fit’ leh tha zinga an tling a nih chuan duhsak zawng te chu kan nei veka zep thu a cheng lo, mahse tling hlawllo hi chu nawrluh ni lo hram se, an mahni an mualpho tho tho. Kan Department ah miin rinna an nghat tawh lo mai ang a tih hi ka inzawt fo mai,’ tiin zawhna a chhang a ni. Khawpui chhim lama a duty lai Zalen in a kawm chuan kea kalte’n lirthei hlauh nachang an hriat hre lo chu a ngaimawh thunga. ‘Sikul zirlai rawlthar leh tleirawl te chu a vang zawnga kalrual an chinga, a sir bera kalte chuan footpath an zawh loa, kawngah an kal ta thin a, ti lo turin chhungte leh zirtirtu te’n zirtir se a tha ka ti,’ tiin kea kalte an him nan a sawi a. An hauhin zirlai thenkhat chuan cho let an ching niin traffic senior chuan a sawi bawk. Traffic police zingah duty laia zu nam/rui an awm thin tih pawh an in hria. ‘Khawiah pawh hetiang chi hi awm ve ngai a ni a, kan hmai timawktu an ni a, kan in thin hrik tawhin ka hriaa, kan pute hauh leh vau an tawk fo,’ tiin traffic senior chuan mipuiin hriatpui se a duh thu a sawi lang.